અમદાવાદ : ભવિષ્યમાં યોજાનારી કોમનવેલ્થ ગેમ્સના યજમાન બનવા તરફ આગળ વધી રહેલા અમદાવાદ શહેરમાં જાહેર પરિવહન વ્યવસ્થાને વિશ્વસ્તરીય બનાવવાની તૈયારીઓ શરૂ કરી દેવામાં આવી છે. શહેરના નાગરિકો અને રમતગમત મહોત્સવ દરમિયાન આવનારા મહેમાનોની સુવિધા માટે AMC દ્વારા મોટા પાયે ઈલેક્ટ્રિક બસો ખરીદવાનો નિર્ણય લેવામાં આવ્યો છે.
કેન્દ્ર સરકારની ‘PM ઈ-ડ્રાઈવ’ યોજના હેઠળ પર્યાવરણની જાળવણી અને પ્રદૂષણ ઘટાડવાના ઉદ્દેશ્ય સાથે AMC દ્વારા પ્રથમ તબક્કામાં 1000 નવી ઈ-બસ ખરીદવા માટેનો ઓર્ડર આપી દેવામાં આવ્યો છે. આ બસો અત્યાધુનિક સુવિધાઓથી સજ્જ હશે, જે મુસાફરોને આરામદાયક અને પ્રદૂષણ મુક્ત મુસાફરીનો અનુભવ કરાવશે.વર્ષ 2027 સુધીમાં અમદાવાદના રસ્તાઓ પર કુલ 1960 નવી ઈલેક્ટ્રિક બસો ઉમેરાશે, જે શહેરના જાહેર પરિવહનનો ચહેરો બદલી નાખશે.
શહેરમાં પ્રદૂષણ ઘટાડવા અને મુસાફરોને અત્યાધુનિક સુવિધા આપવા માટે AMC દ્વારા મોટા પાયે ઈલેક્ટ્રિક બસોના ઓર્ડર આપવામાં આવ્યા છે. જેમાં કુલ 561 ઈલેક્ટ્રિક બસોનો ઓર્ડર અપાયો (AMTS માટે 311 અને BRTS માટે 250). આ બસો 2026 સુધીમાં સેવામાં કાર્યરત થશે. આ કાર્યક્રમ હેઠળ 1000 નવી ઈલેક્ટ્રિક બસોનો ઓર્ડર અપાઈ ચૂક્યો છે. જ્યારે 660 બસો માટે ટેન્ડર પ્રક્રિયા ચાલુ છે અને અન્ય 300 બસો માટે ટૂંક સમયમાં ટેન્ડર બહાર પાડવામાં આવશે.
અમદાવાદ શહેરની પરિવહન ક્ષમતામાં ધરખમ વધારો કરવાના લક્ષ્યાંક સાથે, વર્ષ 2027 સુધીમાં કુલ 1960 નવી બસો રોડ પર દોડતી કરવામાં આવશે. કોમનવેલ્થ ગેમ્સ જેવી મોટી આંતરરાષ્ટ્રીય સ્પર્ધા સમયે ટ્રાફિકનું ભારણ ઘટાડવા અને ખેલાડીઓ તેમજ દર્શકોને ઝડપી કનેક્ટિવિટી પૂરી પાડવા માટે આ માસ્ટર પ્લાન તૈયાર કરવામાં આવ્યો છે.