અમદાવાદ: અમદાવાદ LCB ઝોન-1 ના સ્ટાફે પોલીસે વાહન ચોરીના બે ગુનાનો ભેદ ઉકેલ્યો હતો. અમદાવાદના બે જુદા-જુદા વિસ્તારોમાં બે દ્વિચક્રી વાહનોની ઉઠાંતરીના બનાવનો પર્દાફાશ થયો હતો. ટાઉન પોલીસે શહેરમાંથી ચોરીના બે એક્ટીવા સાથે એક ઈસમને દબોચી લઇ લોકલ ક્રાઇમ બ્રાન્ચ (LCB) ઝોન-1 ની ટીમે પ્રશંસનીય કામગીરી કરી છે.
પ્રાપ્ત રિપોર્ટ મુજબ, અમદાવાદ LCB ઝોન-1 ના પોલીસ સબ ઇન્સ્પેક્ટર જી.કે. ચાવડાના માર્ગદર્શન હેઠળ પોલીસ ટીમ પેટ્રોલિંગમાં હતી. LCB ઝોન-1 પોલીસની સર્વેલન્સ ટીમના માણસો પેટ્રોલિંગમાં હતા, તે દરમિયાન હેડ કોન્સ્ટેબલ અરવિંદભાઈ, કિરણકુમાર અને ભગવાનભાઈ તેમજ પોલીસ કોન્સ્ટેબલ ગંગારામભાઈ અને દેવેન્દ્રકુમારને મળેલી સંયુક્ત ખાનગી બાતમીના આધારે ચોરીના બે એક્ટિવા સાથે એક ઇસમને ઝડપી પાડવામાં આવ્યો હતો.
પોલીસ તપાસમાં આરોપીનું નામ ઉમર અબ્દુલ રહીમ અબ્દુલ રશીદ શેખ (ઉં.વ. 21) બહેરામપુરા, દાણીલીમડાનો હોવાનું જણાવ્યું હતું, પોલીસે અંદાજે 40,000/- ની કિંમતના બે હોન્ડા એક્ટિવા કબજે કર્યા છે. આ ધરપકડથી સાબરમતી રિવરફ્રન્ટ વેસ્ટ પોલીસ સ્ટેશન અને કારંજ પોલીસ સ્ટેશનમાં નોંધાયેલા ચોરીના ગુનાઓ ડિટેક્ટ કરવામાં આવ્યા છે.
ઝડપાયેલો આરોપી ઉમર અબ્દુલ અગાઉ પણ ગુનાહિત પ્રવૃત્તિઓમાં સામેલ હોવાનું સામે આવ્યું છે. તેની સામે અગાઉ વાસણા પોલીસ સ્ટેશનમાં પણ ચોરીનો ગુનો નોંધાયેલો છે. પોલીસ તપાસમાં અન્ય બે આરોપીઓ, અફઝલ અને અયાન (બંને રહે. બહેરામપુરા) ના નામ પણ ખુલ્યા છે, જેમને પકડવા માટે પોલીસે ચક્રો ગતિમાન કર્યા છે.
આ સફળ કામગીરીમાં PSI જી.કે. ચાવડા સહિત ASI મયુરધ્વજસિંહ, ઇન્દ્રજીતસિંહ, આકાશભાઈ અને સમગ્ર LCB ઝોન-1 ના કર્મચારીઓ જોડાયા હતા. અધિક પોલીસ કમિશનર (સેક્ટર-1) નીરજ બડગુજર અને નાયબ પોલીસ કમિશનર (ઝોન-1) ડો. હર્ષદકુમાર પટેલના સીધા માર્ગદર્શન હેઠળ આ ઓપરેશન પાર પાડવામાં આવ્યું હતું.