અમદાવાદ : શહેરના વાસણા વિસ્તારમાં કાયદો અને વ્યવસ્થાના લીરેલીરા ઉડાડતી એક ઘટના સામે આવી છે. વાસણાના ભરવાડ વાસમાં રહેતા ૨૫ વર્ષીય હિતેશ મેઘવાલ નામના યુવકની મધરાતે તીક્ષ્ણ હથિયારના ઘા ઝીંકી નિર્મમ હત્યા કરવામાં આવી છે. સૌથી ચોંકાવનારી વાત એ છે કે, હિતેશની હત્યા તેની સગી બહેનની નજર સામે જ કરવામાં આવી હતી.
પ્રાપ્ત રિપોર્ટ મુજબ, છેલ્લા 20 વર્ષથી વાસણામાં ભાડે રહેતા અને મૂળ રાજસ્થાનના ઉદયપુરના વતની આ શ્રમિક પરિવાર પર અચાનક આભ તૂટી પડ્યું છે. મૃતક હિતેશ સાણંદમાં ફર્નિચરના કારખાનામાં કામ કરીને પરિવારનું ગુજરાન ચલાવતો હતો, તે રાબેતા મુજબ પરિવાર સાથે ઘરની બહાર ખુલ્લામાં પલંગ પર સૂતો હતો. ગત મોડી રાત્રે જ્યારે આખો પરિવાર ગાઢ નિદ્રામાં હતો, ત્યારે અજાણ્યા શખસે તીક્ષ્ણ હથિયાર વડે હિતેશ પર હુમલો કર્યો હતો.હુમલાખોરે હિતેશના શરીર પર ગંભીર ઘા ઝીંક્યા હતા, જેના કારણે તેનું ઘટનાસ્થળે જ કમકમાટીભર્યું મોત નીપજ્યું હતું.
ઘટનાની જાણ થતા જ વાસણા પોલીસનો કાફલો સ્થળ પર દોડી આવ્યો હતો. પ્રાથમિક તપાસમાં પોલીસને શંકા છે કે આ હત્યા પાછળ કોઈ જૂની અદાવત જવાબદાર હોઈ શકે છે. હિતેશના પરિવારના સભ્યો અને પડોશીઓની પૂછપરછ કરવામાં આવી રહી છે. પોલીસે અજાણ્યા હત્યારા સામે ગુનો નોંધી તેને ઝડપી પાડવા માટે સીસીટીવી ફૂટેજ તપાસવાની અને અલગ-અલગ ટીમો બનાવી તપાસ તેજ કરી છે.