અમદાવાદ : શહેરના પોશ વિસ્તાર ગણાતા એવા બોપલના વીવીઆના ફ્લેટમાં ભાડેથી રહેતા યુવકના ઘરે ANTF સ્કવોડે દરોડા પાડીને કોકેઇન,એમ.ડી ડ્રગ, હાઈબ્રીડ ગાંજો, દારુ, બિયરના ટીન અને ચાર મોંઘાદાટ મોબાઈલ ફોન સહિત કુલ રૂ.18 લાખના મુદ્દામાલ સાથે એક આરોપીની ધરપકડ કરી છે. પોલીસે ફરાર ચાર આરોપીની શોધખોળ શરૂ કરી વધુ તપાસ હાથ ધરી છે.
પ્રાપ્ત રિપોર્ટ મુજબ, બોપલ ઘુમા રોડ પર આરોહી ક્લબ પાસે વીવીઆના ફ્લેટમાં ભાડેથી રહેતા યુવકના ફ્લેટમાંથી શંકાસ્પદ આરોપી પાસેથી ગેરકાયદે એમડી ડ્રગ્સનો 102.05 ગ્રામ જથ્થો મળી આવ્યો હતો.આ ઉપરાંત 46.64 ગ્રામ હાઈબ્રિડ ગાંજો, 8.88 ગ્રામ કોકેઈન તથા વિદેશી દારૂની 6 નંગ બોટલ સહિત 24 નંગ બીયરના ટીન મળી આવ્યાં હતાં. પોલીસે તમામ માદક પદાર્થ સાથે આરોપી નિશાંત ભનુભાઈ સોલંકીને ઝડપી પાડ્યો છે. પોલીસે આરોપી પાસેથી અંદાઝે 18 લાખથી વધુનો મુદ્દામાલ કબજે કર્યો છે.
ઝડપાયેલા આરોપીની પૂછપરછ કરતા હકીકત જાણવા મળી છે કે, આરોપી નિશાંત મનુભાઈ સોલંકી (42 વર્ષ) મુળ રાજકોટના કાલાવડ રોડ સ્થિત જ્યોતિનગરમાં રહેવાશી હોવાનું અને હાલમાં અમદાવાદના બોપલ સ્થિત વીવીઆના ફ્લેટ્સમાં B-1203 નંબરના મકાનમાં રહેતો હોવાનું જાણવા મળ્યું છે. આ ઉપરાંત NDPSના ગુનામાં નહીં પકડાયેલા ઈસમોમાં રીક, સાંડ્રા, ઘોસ્ટ તેમજ પ્રોટહબીશનના ગુનામાં નહીં અજ્ય પટેલ નામના આરોપીઓનું નામ સામે આવ્યું છે.
આરોપી વિરૂધ્ધ NDPS એક્ટ 1985ની કલમ NDPS કલમ 8(C), 20(B)(ii)(A), 21(B), 22(C), 29 તથા પ્રોહિબીશન એક્ટની કલમ 65(AA), 116(B), 81 અંતર્ગત ગુનો નોંધીને આ મામલે વધુ તપાસ બોપલ પોલીસ સ્ટેશન, અને અમદાવાદ ગ્રામ્ય પોલીસને સોંપવામાં આવી છે.