અમદાવાદ : શહેરના પશ્ચિમ વિસ્તારમાં આવેલા વ્યસ્ત એવા પરિમલ ગાર્ડન પાસે એક ગંભીર અકસ્માત સર્જાયો હતો. એક પૂરઝડપે આવી રહેલી કારના ચાલકે અચાનક સ્ટીયરીંગ પરથી કાબૂ ગુમાવ્યો હતો, જેના પરિણામે કાર રોડની વચ્ચે આવેલા ડિવાઈડર પર ચઢી ગઈ હતી. અકસ્માત એટલો જોરદાર હતો કે, આસપાસના લોકો ધડાકાના અવાજ સાથે ઘટના સ્થળે દોડી આવ્યા હતા.
પ્રાપ્ત રિપોર્ટ મુજબ, નવરંગપુરામાં આવેલ પરિમલ ગાર્ડન પાસે પૂરઝડપે આવી રહેલી કારના ચાલકે અચાનક સ્ટીયરીંગ પરથી કાબૂ ગુમાવ્યો ત્યારે ડિવાઈડર પર ચઢી ત્યારે ત્યાં લગાવેલો લોખંડનો વીજપોલ (લાઈટનો થાંભલો) પણ ધરાશાયી થઈ ગયો હતો. ટક્કરને કારણે કારના બોનેટના ભાગનો કચ્ચરઘાણ વળી ગયો હતો. સદનસીબે આ અકસ્માતમાં જાનહાનિના કોઈ સમાચાર હજુ સુધી મળ્યા નથી, પરંતુ વાહન અને જાહેર મિલકતને મોટું નુકસાન પહોંચ્યું છે.
અકસ્માતની જાણ થતા જ સ્થાનિક ટ્રાફિક પોલીસનો કાફલો ઘટના સ્થળે પહોંચી ગયો હતો. પોલીસે કારને ક્રેન મારફતે હટાવવાની કામગીરી કરી હતી અને ટ્રાફિક પૂર્વવત કરાવ્યો હતો. કારચાલક નશાની હાલતમાં હતો કે, કેમ અથવા અકસ્માત પાછળનું ટેકનિકલ કારણ શું છે, તે દિશામાં પોલીસે તપાસ હાથ ધરી છે.