ગાંધીનગર : રાજ્ય સરકાર દ્વારા શૈક્ષણિક વર્ષ 2026-27 માટે ‘રાઈટ ટુ એજ્યુકેશન’ (RTE) હેઠળ ખાનગી પ્રાથમિક શાળાઓમાં ધોરણ-1માં પ્રવેશ મેળવવા માટેની ઓનલાઈન અરજી કરવાની મુદતમાં વધારો કરવામાં આવ્યો હતો. અગાઉ ઓનલાઈન ફોર્મ ભરવાની અંતિમ તારીખ 17 એપ્રિલ 2026ના રોજ રાત્રિના 12:00 કલાક સુધી નક્કી કરવામાં આવી હતી. જોકે, વાલીઓ અને વિદ્યાર્થીઓના હિતને ધ્યાને રાખીને હવે આ સમયગાળો લંબાવવામાં આવ્યો છે, RTE અંતર્ગત પ્રવેશ માટે 23 એપ્રિલ સુધી અરજી કરી શકાશે. જેથી વધુમાં વધુ જરૂરિયાતમંદ બાળકો આ યોજનાનો લાભ લઈ શકે.
નવી જાહેરાત મુજબ, હવે પાત્રતા ધરાવતા ઉમેદવારો આગામી 23 એપ્રિલ 2026, ગુરુવાર સુધી RTE વેબપોર્ટલ પર ઓનલાઈન અરજી કરી શકશે. ઉલ્લેખનીય છે કે, RTE એક્ટ-2009ની કલમ 12.1 (સી) અન્વયે બિન-અનુદાનિત ખાનગી પ્રાથમિક શાળાઓમાં 25 ટકા બેઠકો પર નબળા અને વંચિત જૂથના બાળકોને વિનામૂલ્યે પ્રવેશ આપવામાં આવે છે. જે વાલીઓએ હજુ સુધી ફોર્મ ભર્યા નથી, તેઓ આ લંબાવવામાં આવેલી મુદતનો ઉપયોગ કરી નિર્ધારિત સમય મર્યાદામાં પોતાની અરજી પૂર્ણ કરી શકશે.
સ્થાનિક ચૂંટણીને લીધે વાલીઓને જરૂરી ડોક્યુમેન્ટ એકત્ર કરવામાં ભારે મુશ્કેલી પડતી હોવાથી અરજી કરવાની મુદત લંબાવવાની માંગ ઊઠી હતી. રાજ્યની 9,722 જેટલી ખાનગી શાળાઓમાં 84 હજાર કરતા વધુ બેઠકો પર પ્રવેશ આપવા માટે ગત 4 એપ્રિલથી કાર્યવાહી શરૂ કરવામાં આવી છે. અત્યાર સુધીમાં 2,09,482 ફોર્મ ભરાયા હોવાનું જાણવા મળ્યું છે. ગત વર્ષે રાજ્યભરમાંથી કુલ 2,38,942 વિદ્યાર્થીઓના ફોર્મ ભરાયા હતા.