અમદાવાદ : અમદાવાદના વાડજમાં વિસ્તારમાં એક યુવકે હાથમાં હથિયાર લઈને રોડ પરથી પસાર થતાં લોકોને ધમકાવતો વીડિયો સોશિયલ મીડિયામાં વાયરલ થયો હતો.જાહેર માર્ગ પર હથિયાર પ્રદર્શન કરીને ભયનું વાતાવરણ ઉભું કરનાર આ શખ્સની ઓળખ રાજ ઉર્ફે રાજા દંતાણી તરીકે થઈ છે. વીડિયો વાયરલ થતા જ હરકતમાં આવેલી પોલીસે ગણતરીના કલાકોમાં જ આરોપીને ઝડપી પાડીને જેલના સળિયા પાછળ ધકેલી દીધો છે.
રિપોર્ટ મુજબ, બે દિવસ અગાઉ આરોપી રાજ ઉર્ફે રાજા દંતાણીએ વાડજ વિસ્તારમાં રામાપીરના ટેકરા પાસે જાહેરમાં હથિયાર બતાવીને લોકોમાં ડર પેદા કરવાના અને પોતાની ધાક જમાવવાના આશયથી વીડિયો બનાવ્યો હતો. સોશિયલ મીડિયા પર આ વીડિયો ફરતો થતા જ વાડજ પોલીસ એક્શન મોડમાં આવી હતી. પોલીસે ટેકનિકલ સર્વેલન્સ અને બાતમીદારોની મદદથી આરોપીનું લોકેશન ટ્રેસ કર્યું હતું અને તેની અટકાયત કરી હતી.
આરોપીએ જે રીતે વીડિયો બનાવીને રોફ જમાવવાનો પ્રયાસ કર્યો હતો, પોલીસે પણ તેની ધરપકડ બાદ કાયદેસરની કાર્યવાહી કરી તેની શાન ઠેકાણે લાવી દીધી છે. વાડજ પોલીસે આરોપી સામે ગુનો નોંધી હથિયારબંધીના જાહેરનામાના ભંગ બદલ કડક કાર્યવાહી કરી છે. પોલીસે પકડાયેલા આરોપીનો એક વીડિયો પણ જાહેર કર્યો છે, જેમાં તે હવે કાયદાના સકંજામાં જોવા મળી રહ્યો છે. આ કાર્યવાહીથી વિસ્તારના અસામાજિક તત્વોમાં ફફડાટ વ્યાપી ગયો છે.
તમને જણાવી દઈએ કે બે દિવસ અગાઉ સોશિયલ મીડિયા પર વાઈરલ થયેલા વીડિયોમાં આરોપી હાથમાં ધારદાર હથિયાર લઈને જાહેરમાં રસ્તા પરથી પસાર થતા રાહદારીઓ અને વાહનચાલકોને ધમકાવી રહ્યો હતો. “અહીંથી કોઈએ પસાર થવું નહીં, ચિકનની દુકાન સિવાયની તમામ દુકાનો તાત્કાલિક બંધ કરી દો” તેમ કહીને લોકોને ધમકાવ્યા હતા. વીડિયોમાં દેખાતા ટપોરી છાપ શખસે જાહેરમાં હથિયાર કાઢી પોલીસ અને BRTS તંત્રને બેફામ ગાળો આપી હતી.