અમદાવાદ : અમદાવાદના ચાંદખેડા વિસ્તારમાં બાળક ચોરીની એક સનસનાટીભરી ઘટના સામે આવી છે. ધોળા દિવસે ભરચક વિસ્તારમાં એક યુવાને 7 વર્ષના બાળકનું અપહરણ કરવાનો પ્રયાસ કર્યો હતો, પરંતુ આસપાસના લોકોની સતર્કતાને કારણે મોટી હોનારત ટળી હતી. ONGC અને GSC કો-ઓપરેટિવ બેંક પાસે બનેલી આ ઘટનાએ સ્થાનિક રહીશોમાં ફાળ પાડી દીધી છે. લોકોએ શંકાસ્પદ યુવાનને પકડી પાડી તેને મેથીપાક ચખાડ્યો હતો અને ત્યારબાદ પોલીસના હવાલે કર્યો હતો.
રિપોર્ટ મુજબ, ચાંદખેડામાં જી.એસ.સી. કો-ઓપરેટિવ બેંક પાસે આવેલી સોસાયટીમાં રહેતો સાત વર્ષનો બાળક બપોરે એક વાગ્યાની આસપાસ ઘર નજીક છાશ લેવા જઈ રહ્યો હતો. આ દરમિયાન ઉત્તર પ્રદેશનો શિવમ યાદવ નામનો યુવક ત્યાંથી પસાર થઈ રહ્યો હતો. તેણે બાળકને જોઈ તેને પોતાની સાથે લઈ જવાનો પ્રયાસ કર્યો હતો.
યુવક જ્યારે બાળકને લઈ જઈ રહ્યો હતો, ત્યારે આસપાસના લોકોનું ધ્યાન ગયું હતું. બનાવની ગંભીરતા જોઈ સ્થાનિકોએ તરત જ શિવમને અટકાવ્યો હતો અને બાળકની પૂછપરછ કરી તેને મુક્ત કરાવ્યો હતો. ગુસ્સે ભરાયેલા લોકોએ શિવમ યાદવને જાહેરમાં ‘મેથીપાક’ આપ્યો હતો અને સમગ્ર મામલે ચાંદખેડા પોલીસને જાણ કરી હતી.આ ઘટનાના વીડિયો પણ સોશિયલ મીડિયા પર વાયરલ થયા છે, જેમાં લોકો આરોપીને મેથીપાક આપી રહ્યા છે.
ઝડપાયેલા આરોપીની પ્રાથમિક પૂછપરછ કરતા તેનું નામ શિવમ યાદવ હોવાનું સામે આવ્યું છે. તે મૂળ ઉત્તર પ્રદેશનો રહેવાસી છે અને ભાવનગરમાં મજૂરી કામ કરતો હતો. આરોપીએ જણાવ્યું હતું કે તે ભાવનગરથી ટ્રેન મારફતે અમદાવાદ આવ્યો હતો. જોકે, તે અમદાવાદ શા માટે આવ્યો હતો અને બાળકને કયા ઈરાદે લઈ જતો હતો, તે દિશામાં હજુ તપાસ ચાલી રહી છે.
ઘટનાની જાણ થતા જ ચાંદખેડા પોલીસનો કાફલો સ્થળ પર પહોંચી ગયો હતો. પોલીસે આરોપી શિવમ યાદવની અટકાયત કરી તેને પોલીસ સ્ટેશન લઈ ગઈ છે. હાલમાં તેની વિરુદ્ધ અપહરણના પ્રયાસ અને અન્ય કાયદેસરની કલમો હેઠળ ફરિયાદ નોંધવાની તજવીજ હાથ ધરવામાં આવી છે. આ ઘટનાએ ફરી એકવાર વાલીઓ માટે લાલબત્તી સમાન કિસ્સો પૂરો પાડ્યો છે કે પોતાના બાળકોને એકલા બહાર મોકલતી વખતે સાવચેતી રાખવી અનિવાર્ય છે.