અમદાવાદ : અમદાવાદના રમત-ગમતના શોખીનો અને ખાસ કરીને ઉનાળાના વેકેશનની રાહ જોતા પરિવારો માટે આનંદના સમાચાર સામે આવ્યા છે. અમદાવાદ મ્યુનિસિપલ કોર્પોરેશન (AMC) દ્વારા લેવાયેલા એક મહત્વના નિર્ણય મુજબ, શહેરનું લોકપ્રિય પ્રવાસન સ્થળ કાંકરિયા લેકફ્રન્ટ હવે સોમવારે પણ મુલાકાતીઓ માટે ખુલ્લું રાખવામાં આવશે. આ ફેરફાર વેકેશનના સમયગાળા દરમિયાન લોકોની ભીડ અને મનોરંજનની જરૂરિયાતને ધ્યાને રાખીને કરવામાં આવ્યો છે.
રિપોર્ટ મુજબ, સામાન્ય રીતે, જાળવણી અને સાફ-સફાઈના હેતુથી કાંકરિયા લેકફ્રન્ટ દર સોમવારે મુલાકાતીઓ માટે બંધ રાખવામાં આવતું હોય છે. પરંતુ હાલમાં ઉનાળુ વેકેશન શરૂ થઈ રહ્યું હોવાથી, ૨૭ એપ્રિલથી લઈને 8 જૂન સુધીના તમામ સોમવારે કાંકરિયા લેકફ્રન્ટ સત્તાવાર રીતે ખુલ્લું રહેશે. આ સમયગાળા દરમિયાન બાળકો અને મોટેરાઓ અઠવાડિયાના તમામ સાતેય દિવસ અહીંના વિવિધ આકર્ષણોનો આનંદ માણી શકશે. કોર્પોરેશનનો આ નિર્ણય પ્રવાસીઓની સુવિધામાં વધારો કરશે અને ખાસ કરીને જે પરિવારો સોમવારે રજા ધરાવતા હોય તેમને ફરવા માટે ઉત્તમ સ્થળ મળી રહેશે.
અમદાવાદ મનપા તરફથી સામે આવી રહેલી માહિતી મુજબ આગામી તા. 27-04-2026, તા. 04-05-2026, તા. 11-05-2026, તા. 18-05-2026, તા. 25-05-2026, તા. 01-06-2026 તથા તા. 08-06-2026ના રોજ સોમવાર હોવા છતાં કાંકરિયા લેકફ્રન્ટ સહિતના પરિસરમાં આવેલા તમામ મુખ્ય આકર્ષણો ખુલ્લા રહેશે.આ નિર્ણય હેઠળ કાંકરિયા લેકફ્રન્ટ, કિડ્સ સિટી, નોક્ટર્નલ ઝૂ (પ્રાણી સંગ્રહાલય), બાલવાટિકા, નગીનાવાડી, બટરફ્લાય પાર્ક તેમજ અન્ય તમામ રિક્રિએશન પ્રવૃત્તિઓ નાગરિકો માટે ઉપલબ્ધ રહેશે.
ઉનાળાની રજાઓ દરમિયાન બાળકો અને પરિવાર સાથે ફરવા આવતા નાગરિકોને વધુ સમય અને સુવિધા મળી રહે તે માટે આ પહેલ હાથ ધરવામાં આવી છે. અમદાવાદ મ્યુનિસિપલ કોર્પોરેશન દ્વારા નાગરિકોને આ વિશેષ સુવિધાનો પૂરતો લાભ લેવા અનુરોધ કરવામાં આવ્યો છે.