અમદાવાદ : અમદાવાદ મ્યુનિસિપલ કોર્પોરેશનની સ્ટેન્ડિંગ કમિટીની બેઠક યોજાઈ હતી. બેઠકમાં શહેરના વિવિધ વિકાસલક્ષી કામો, નાગરિકલક્ષી સુવિધાઓ, વહીવટી બાબતો તેમજ શહેરના સર્વાંગી વિકાસને લગતા વિવિધ મહત્વપૂર્ણ મુદ્દાઓ અંગે ચર્ચા-વિચારણા કરવામાં આવી હતી.
આગામી તહેવારોની સિઝનને ધ્યાને રાખી અમદાવાદ મ્યુનિસિપલ કોર્પોરેશન (AMC) ના ફૂડ વિભાગ દ્વારા શહેરમાં ચેકિંગ ઝુંબેશ શરૂ કરવામાં આવી છે. નાગરિકોને શુદ્ધ અને આરોગ્યપ્રદ ખોરાક મળી રહે તે માટે AMC ની સ્ટેન્ડિંગ કમિટી દ્વારા મીઠાઈ અને ફરસાણની દુકાનોમાં રેપિડ ટેસ્ટિંગ કીટ મૂકવા ફૂડ વિભાગના અધિકારીઓને સૂચના અપાઈ છે.
ગ્રાહકોને મીઠાઈ કે ખાદ્ય પદાર્થની ગુણવત્તા અંગે કોઈ શંકા હોય તો સ્થળ પર જ તેની પ્રાથમિક ચકાસણી કરી શકાય તે માટે આ વ્યવસ્થા કરવામાં આવી છે. મીઠાઈમાં વપરાતા માવાની શુદ્ધતા તેમજ કાજુ કતરી જેવી મીઠાઈ પર લગાવવામાં આવતા વરખની ગુણવત્તા ચકાસી શકાય તે માટે ટેસ્ટિંગ કીટનો ઉપયોગ કરવાનો રહેશે. વેપારીઓએ પોતાની દુકાને ટેસ્ટિંગ કીટ ઉપલબ્ધ રાખી તેનો યોગ્ય ઉપયોગ કરવાનો રહેશે.
ખાદ્ય પદાર્થોમાં ભેળસેળ અથવા નિયમોનો ભંગ જણાય તો પ્રવર્તમાન નિયમો અનુસાર દંડ સહિતની કાયદેસરની કાર્યવાહી કરવામાં આવશે. નાગરિકોને ખાદ્ય પદાર્થ અંગે કોઈ ફરિયાદ હોય તો સંબંધિત તંત્રને જાણ કરી શકાશે. ફરિયાદ માટે હેલ્પલાઇન નંબર 155303નો ઉપયોગ કરી શકાશે.
ભૂતકાળમાં પણ સ્ટેન્ડિંગ કમિટી દ્વારા ફરસાણની દુકાનોમાં તળવા માટે વપરાતા તેલની ગુણવત્તા ચકાસવા માટે TPC (Total Polar Compounds) મશીન મુકવાની જાહેરાત કરાઈ હતી. જોકે, હજુ સુધી મોટાભાગની દુકાનોમાં આ મશીનો જોવા મળતાં નથી. આથી, રેપિડ ટેસ્ટિંગ કીટ મૂકવાના આ નવા આદેશનું યોગ્ય રીતે અમલીકરણ થશે કે નહીં તે સામે સવાલો ઊભા થઈ રહ્યા છે.