અમદાવાદ : શહેરના બોપલ-શીલજ વિસ્તારમાં રફતારના કહેરનો એક ચોંકાવનારો બનાવ સામે આવ્યો છે. લગ્નના માત્ર બે જ મહિનામાં એક પરિવારે પોતાની નવવધૂ ગુમાવતા અરેરાટી વ્યાપી ગઈ છે. ગરબા ક્લાસ પૂરા કરીને પતિ-પત્ની અલગ-અલગ ટુ-વ્હીલર પર ઘરે પરત ફરી રહ્યા હતા, ત્યારે ડીપીએસ કેનાલ રોડ પર માધવ અધવેદ કોમ્પ્લેક્ષ પાસે પુરઝડપે આવી રહેલા બાઈકચાલકે પત્નીના એક્સેસ વાહનને જોરદાર ટક્કર મારી હતી. અકસ્માત સર્જી બાઈકચાલક વાહન સ્થળ પર જ મૂકી ફરાર થઈ ગયો હતો. સમગ્ર ઘટના સીસીટીવીમાં કેદ થતાં બોપલ પોલીસે ગુનો નોંધી કાયદેસરની કાર્યવાહી હાથ ધરી છે. આ ભયાનક અકસ્માતની સમગ્ર ઘટના નજીકના CCTVમાં પણ કેદ થઈ ગઈ છે.
રિપોર્ટ મુજબ, બોપલમાં રહેતા 30 વર્ષીય હાર્દિક દરજી કોરિયોગ્રાફર છે. હાલમાં સાયન્સ સીટીમાં આવેલા બ્લુમિંગ કેમ્પમાં ગરબા કલાસ ચલાવે છે. તેમના લગ્ન બે મહિના પહેલા વસ્ત્રાપુરની નિશિબેન સાથે થયા હતા. 11 સપ્ટેમ્બરે સાંજે તે ગરબા કલાસમાં ગયા હતા. બાદમાં પૂર્ણ કરીને રાત્રે પત્ની ટુ-વ્હીલર એક્સેસ અને હાર્દિક બાઈક પર ઘરે જઈ રહ્યા હતા.ત્યારે DPS કેનાલ રોડ પર માધવ અધવેદ કોમ્પ્લેક્ષ પાસે પહોંચ્યા હતા. જ્યાં વળાંક પર ટર્ન લેતા સમયે પુરઝડપે આવી રહેલા બાઈક ચાલકે એક્સેસને ટક્કર મારી હતી. જો કે પતિ આ ટક્કર સમયે થોડા આગળ નીકળ્યા હોવાથી તેમનો બચાવ થયો હતો.આ ટક્કર એટલી ભયાનક હતી કે, નિશિબેન એક્સેસ સાથે ઢસડાયા હતા. જેથી તેમને ગંભીર ઈજા પહોંચી હતી. પતિ હાર્દિક અને આસપાસના લોકોએ તાત્કાલિક ઇજાગ્રસ્ત નિશિબેનને સારવાર માટે હોસ્પિટલ ખસેડયા હતા. પરંતુ સારવાર દરમિયાન મોત નિપજ્યું હતું.
પ્રાથમિક તપાસમાં અકસ્માત સર્જનાર બાઈક રાજસ્થાન પાસિંગનું હોવાનું અને બાઈકચાલક તેમજ પાછળ બેઠેલો શખસ ઘરઘાટી તરીકે કામ કરતા હોવાનું સામે આવ્યું છે. અકસ્માત સમયે બાઈક પર બે વ્યક્તિ સવાર હતા. જેમાં ચાલક ભાગી ગયો હતો અને પાછળ બેસેલા વ્યક્તિને સ્થાનિકોએ પકડીને પોલીસના હવાલે કર્યો હતો. અકસ્માત બાદ બાઈક મૂકીને ચાલક નાસી ગયો હતો. જો કે અકસ્માતને લઈ બોપલ પોલીસે બાઈક ચાલક સામે ગુનો નોંધ્યો છે.