અમદાવાદ : અમદાવાદમાં બુલેટ ટ્રેનની રાહ જોઈ રહેલા લોકો માટે ખુશખબર છે. મુંબઈ-અમદાવાદ બુલેટ ટ્રેન પ્રોજેક્ટ માટે અમદાવાદમાં સાબરમતી નદી પર 480 મીટર લાંબા વિશાળ બ્રિજનું બાંધકામ સફળતાપૂર્વક પૂર્ણ કરી લેવામાં આવ્યું છે. જે અમદાવાદ-દિલ્હી મુખ્ય રેલવે લાઇન તેમજ વર્તમાન મેટ્રો અને ફ્લાયઓવર જેવા માળખાઓ પરથી જરૂરી વર્ટિકલ ક્લિયરન્સ સાથે પસાર થાય છે.
આ બ્રિજ અંગે આપવામાં આવેલી માહિતી અનુસાર, સાબરમતી નદી પર 480 મીટર લાંબા વિશાળ બ્રિજ આશરે 36 મીટર ઊંચો આ પુલ 12 માળની ઇમારત જેટલો ઊંચો છે (આશરે 118 ફૂટ) અને અમદાવાદમાં બુલેટ ટ્રેન કોરિડોરના મુખ્ય માળખાકીય કાર્યોમાંનો એક છે. આ પુલ પશ્ચિમ રેલવેની અમદાવાદ-દિલ્હી મુખ્ય રેલવે લાઇનની નજીક આવેલો છે, જે જમીન સ્તરથી આશરે 14.8 મીટરની ઊંચાઈ પર છે.સાબરમતી અને અમદાવાદ બુલેટ ટ્રેન સ્ટેશન વચ્ચે આવેલો આ પુલ સમગ્ર હાઇ-સ્પીડ રેલ કોરિડોરના મહત્વપૂર્ણ માળખાકીય કાર્યોમાંનો એક છે.
આ બ્રિજ સાબરમતી અને અમદાવાદ બુલેટ ટ્રેન સ્ટેશન વચ્ચે આવેલો છે. તે સાબરમતી સ્ટેશનથી આશરે 1 કિલોમીટર અને અમદાવાદ સ્ટેશનથી આશરે 4 કિલોમીટરના અંતરે છે.મુંબઈ-અમદાવાદ હાઈ સ્પીડ રેલ કોરિડોરનું અલાઇનમેન્ટ અમદાવાદમાં અનેક વર્તમાન માળખાકીય સુવિધાઓ, જેમ કે ફ્લાયઓવર, બ્રિજ, રેલવે લાઇન અને મેટ્રો કોરિડોરને પાર કરે છે. હાલની માળખાકીય સુવિધાઓથી જરૂરી વર્ટિકલ ક્લિયરન્સ જાળવવા માટે સાબરમતી નદી બ્રિજના પિયર્સની ઊંચાઈ વધુ રાખવામાં આવી છે.
આ બ્રિજમાં 08 સર્ક્યુલર પિયર્સ છે, જેનો વ્યાસ 6 થી 6.5 મીટરની વચ્ચે છે. તેમાંથી 04 પિયર્સ નદીના પટમાં, 02 પિયર્સ નદીના બંને કિનારા પર—દરેક તરફ 01, જ્યારે 02 પિયર્સ નદીના કિનારાની બહાર આવેલા છે. પિયર્સની વ્યૂહાત્મક ગોઠવણીથી નદીના જળપ્રવાહમાં ઓછામાં ઓછો અવરોધ રહે તે સુનિશ્ચિત કરવામાં મદદ મળી છે.મુંબઈ-અમદાવાદ બુલેટ ટ્રેન કોરિડોરના મોટા ભાગના નદી બ્રિજમાં આશરે 40 મીટરના નાના સ્પાન છે, જ્યારે સાબરમતી નદી બ્રિજમાં 50 થી 76 મીટર સુધીના લાંબા સ્પાન બનાવવામાં આવ્યા છે. આથી નદીના પટમાં જરૂરી પિયર્સની સંખ્યા ઘટાડવામાં મદદ મળી છે.
આ બ્રિજમાં 76 મીટરના પાંચ સ્પાન અને 50 મીટરના બે સ્પાનનો સમાવેશ થાય છે. દરેક સ્પાનમાં 23 સેગમેન્ટ છે, જેનું કાસ્ટિંગ બાંધકામ સ્થળ પર જ ઇન-સિટુ કરવામાં આવ્યું છે. આ સેગમેન્ટના બાંધકામ માટે ઉચ્ચ સ્તરની પ્રિસિઝન એન્જિનિયરિંગ, કુશળ માનવબળ તેમજ દરેક તબક્કે ગુણવત્તાની ચકાસણી જરૂરી રહી છે.મુંબઈ-અમદાવાદ બુલેટ ટ્રેન કોરિડોરમાં કુલ 25 નદી બ્રિજ છે, જેમાંથી 21 ગુજરાતમાં અને 4 મહારાષ્ટ્રમાં છે. ગુજરાતમાં નિર્ધારિત 21 નદી બ્રિજમાંથી 18નું બાંધકામ હવે પૂર્ણ થઈ ગયું છે.