અમદાવાદ : અમદાવાદમાં ઘરેલુ હિંસાના બનાવો દિનપ્રતિદિન વધી રહ્યા છે. મહિલાઓ સાથે ઘરેલુ હિંસા, દહેજની માંગણી, મારઝૂડ જેવી ઘટનાની ઘણી ફરિયાદો પોલીસ ચોપડે નોંધાતી હોય છે, આવી ચાંદખેડા વિસ્તારમાં એક અત્યંત દુઃખદ અને ચોંકાવનારી ઘટના સામે આવી છે. અહીં રહેતી 30 વર્ષીય પરિણીતાએ પોતાના જ પતિ અને સાસરિયાઓના સતત ત્રાસથી કંટાળીને ફ્લેટના ચોથા માળેથી કૂદીને આપઘાત કરી લીધો છે.આ મામલે ચાંદખેડા પોલીસે મૃતકના પતિ સહિત ચાર લોકો સામે ગુનો નોંધીને કાયદેસરની કાર્યવાહી હાથ ધરી છે.
રિપોર્ટ મુજબ, શહેરના નવા વાડજ વિસ્તારમાં રહેતા ડાહ્યાભાઈ રાવતની 30 વર્ષીય દીકરી જયાના લગ્ન ચાંદખેડામાં રહેતા સુનિલ જાદવ સાથે પ્રેમ લગ્ન કર્યાં હતાં. લગ્નના થોડા સમય સુધી બધું બરાબર રહ્યું, પરંતુ ત્યારબાદ પતિ સુનિલે દેવું થયું હોવાનું જણાવીને પિયરમાંથી 2 લાખ રૂપિયા મંગાવવા માટે જયા પર દબાણ કરવાનું શરૂ કર્યું. જયાના પિતાએ દીકરીના સંસાર માટે 2 લાખ રૂપિયા આપ્યા બાદમાં પણ પતિ અને સાસરિયાઓ દ્વારા પરીણિતાને અવારનવાર શારીરિક અને માનસિક રીતે પ્રતાડિત કરવામાં આવતી હતી.
લગ્ન બાદ પરીણિતાનું જીવન કઠિન બની ગયું હતું. ત્યારબાદ પતિ પણ થોડા સમય પછી દારુના રવાડે ચડી જતાં તેની સાથે મારઝૂડ કરતો હતો. તેમજ જ્યારે પરીણિતા તેના પતિને દારુ પીવાથી અટકાવતી તો તે જાનથી મારી નાખવાની ધમકી આપતો. લગ્નજીવનથી સતત ત્રાસી ગયેલી પરીણિતાએ આખરે અંતિમ પગલું ભરી લેવાનો નિર્ણય લીધો હતો. 8 ઓક્ટોબરના રોજ પરીણિતાએ તેની બહેન સાથે અંતિમ વાતચીત કરી હતી.
ત્યારબાદ ફ્લેટના ચોથા માળેથી પડતું મૂકીને પોતાનો જીવનો અંત આણી દીધો હતો. જ્યારે સમગ્ર ઘટનાની જાણ પિતાને થઈ ત્યારે તેઓ તાત્કાલિક પોલીસ સ્ટેશને જઈને પુત્રીના આપઘાત મામલે પતિ, નણંદ સાસુ અને સસરા વિરુદ્ધ આત્મહત્યાની દુષ્પ્રેરણાની ફરિયાદ દાખલ કરી હતી. હાલ સમગ્ર મામલે સ્થાનિક પોલીસે ગુનો નોંધીને કાર્યવાહી હાથ ધરી છે.