અમદાવાદ : કોમનવેલ્થ ગેમ્સ બાદ વધુ એક વિશ્વ સ્તરની રમત ગમત સ્પર્ધાની યજમાની અમદાવાદને મળી છે. વિશ્વની સૌથી પ્રતિષ્ઠિત સ્પર્ધાઓ પૈકીની એક એવી વર્લ્ડ વેઇટલિફ્ટિંગ ચેમ્પિયનશિપ 2029 નું આયોજન અમદાવાદ શહેરમાં કરવામાં આવશે. દેશના ઇતિહાસમાં આ સૌપ્રથમ વખત બનશે જ્યારે વર્લ્ડ વેઇટલિફ્ટિંગ ચેમ્પિયનશિપ ભારતની ધરતી પર રમાશે. અને તેમાં પણ અમદાવાદની યજમાની મળતા ગુજરાતના ખેલપ્રેમીઓમાં આનંદની લાગણી વ્યાપી ગઈ છે.
રિપોર્ટ મુજબ, આ ઐતિહાસિક ઉપલબ્ધિ અંગે રાજ્યના રમતગમત મંત્રી હર્ષ સંઘવીએ સોશિયલ મીડિયા પ્લેટફોર્મ એક્સ પર સત્તાવાર માહિતી શેર કરી દેશવાસીઓ અને રમતપ્રેમીઓને અભિનંદન પાઠવ્યા છે. ગુજરાતમાં નિર્માણ પામેલા અત્યાધુનિક સ્પોર્ટ્સ ઇન્ફ્રાસ્ટ્રક્ચર અને સ્ટેડિયમોના કારણે અમદાવાદ હવે વૈશ્વિક સ્તરે રમતગમતની પ્રમુખ પસંદગી બની ચૂક્યું છે. અમદાવાદ ખાતે અગાઉ કોમનવેલ્થ વેઇટલિફ્ટિંગ ચેમ્પિયનશિપ 2025 અને એશિયન વેઇટલિફ્ટિંગ ચેમ્પિયનશિપ 2026 ના સફળ આયોજનો બાદ, હવે વિશ્વ કક્ષાની સૌથી મોટી 2029 ની વૈશ્વિક સ્પર્ધા પણ અહીં યોજાવા જઈ રહી છે.હવે વિશ્વભરના શ્રેષ્ઠ વજનઉંચાકકો (વેઇટલિફ્ટર્સ) પોતાના કૌશલ્યનો જાદુ બતાવવા ગુજરાતના આંગણે પધારશે.
અમદાવાદમાં આટલી મોટી વિશ્વ સ્તરની ચેમ્પિયનશિપનું આયોજન થવાથી રમતગમત ક્ષેત્રે ભારતની સિદ્ધિ અને વૈશ્વિક ઓળખમાં પોતાનું નામ અંકિત કરશે. આ ટૂર્નામેન્ટના આયોજનથી સ્થાનિક ખેલાડીઓને વૈશ્વિક સ્તરનું એક્સપોઝર મળશે અને દેશના યુવાનોને રમતગમતમાં આગળ વધવા માટે એક નવું પ્રોત્સાહન અને પ્રેરણા પૂરી પાડશે. ગુજરાતમાં આંતરરાષ્ટ્રીય સ્તરની સ્પોર્ટ્સ ઇન્ફ્રાસ્ટ્રક્ચર સુવિધાઓના સતત વિકાસને કારણે અમદાવાદ હવે વિશ્વના મોટા રમતગમતના કાર્યક્રમો માટે એક પ્રમુખ હબ તરીકે ઉભરી રહ્યું છે. 2029ની આ વર્લ્ડ ચેમ્પિયનશિપ ભારતને વિશ્વ રમતગમત ક્ષેત્રે વધુ મહત્વની ભૂમિકા ભજવશે.
ભારતીય વેઈટલિફ્ટિંગ ફેડરેશનના પ્રમુખ સહદેવ યાદવે જણાવ્યું કે, ભારતીય વેઈટલિફ્ટિંગ માટે આ એક મોટો દિવસ છે કારણ કે IWF વર્લ્ડ ચેમ્પિયનશિપ પહેલીવાર ભારતમાં આવી રહી છે અને તેનું આયોજન અમદાવાદમાં કરવામાં આવશે. રશિયા અને વેનેઝુએલાએ 2029 ચેમ્પિયનશિપ માટે જોરદાર દાવેદારી કરી હતી. IWF એક્ઝિક્યુટિવ બોર્ડે ભારતમાં વિશ્વાસ મૂક્યો છે. વધુમાં જણાવ્યું કે, 2029 IWF વર્લ્ડ ચેમ્પિયનશિપ ભારતમાં યોજાનારી 2030 કોમનવેલ્થ ગેમ્સ માટે ક્વોલિફાઇંગ ઇવેન્ટ પણ હશે.