અમદાવાદ : શહેરમાં ફરી શ્વાનનો આતંક વધી રહ્યો છે. શ્વાનના કારણે રોજ અનેક લોકો હેરાન પરેશાન થઈ રહ્યા છે. ત્યારે શહેરના સરખેજ વિસ્તારમાં સોનલ સિનેમા રોડ ઉપર ગંભીર ઘટના સામે આવી છે. ઘોડિયામાં સૂતેલા ત્રણ મહિનાના બાળકને ચાર જેટલા શ્વાનો ઉચકીને તેને બચકાં ભરી લીધા હતા. સ્થાનિક લોકો જોઈ જતા તાત્કાલિક તેઓ દોડ્યા હતા અને બાળકને શ્વાનોના મુખમાંથી છોડાવ્યું હતું. પગના અને કમરના ભાગે બાળકને બચકાં અને નખ વાગતા ઈજાગ્રસ્ત થયું હતું. જેથી તેને તાત્કાલિક સારવાર માટે હોસ્પિટલમાં ખસેડવામાં આવ્યું હોવાની વિગતો મળી છે.
પ્રાપ્ત વિગતો મુજબ મકાનના કોટ પાસે છાયડાંમાં શ્રમિક પરિવાર કામ પર હતો અને પોતાના બાળક માટે ત્યાં ઘોડિયું બાંધવામાં આવેલું હતું, આ ઘોડિયામાં બાળક હતું પરંતુ તેની આસપાસ કોઈ હતું નહી. આ દરમિયાન ત્યાં અચાનક ચારથી પાંચ શ્વાનો આવી પહોંચે છે અને બાળક પર હુમલો કરીને તેને ઘોડિયામાંથી બહાર કાઢી લે છે. આ પછી અચાનક ત્યાં રમતા લોકોની નજર પડે છે અને બાળકને બચાવવા માટે દોડધામ શરુ થઈ જાય છે. એટલામાં એક જગ્યા પર જ્યાંથી શ્વાનો બાળકને મોઢામાં નાખીને લઈ જઈ રહ્યા હતા ત્યાં યુવક દ્વારા બાળકને બચાવી લેવામાં આવી છે.
બાળકના પગ સહિતના ભાગે શ્વાનો દ્વારા હુમલો કરીને બચકાં ભરી લેવામાં આવ્યા છે. હાલ બાળકને સારવાર માટે ખસેડવામાં આવ્યું હતું. હાલ બાળકની સ્થિતિ સારી હોવાનું કહેવાઈ રહ્યું છે.
