અમદાવાદ : શહેરના તમામ વિસ્તારોની સોસાયટીઓ અને ચાલીઓમાંથી ઘનકચરો એકત્ર કરવાની કામગીરી કરતાં મોટા વગદાર કોન્ટ્રાક્ટરોની ગાડી કોઇ એક સોસાયટી કે ચાલીમાં ન જાય તો ફક્ત પાંચ રૂપિયા દંડ વસૂલ કરવાની જોગવાઇ સાંભળીને મ્યુનિ.કમિશનર પણ ચોંકી ઊઠ્યા હતા અને સોસાયટીને બદલે મકાન દીઠ દંડ વસૂલ કરવાની તાકીદ કર્યા બાદ આખરે ડોર ટુ ડોરની ગાડી જે તે સોસાયટી કે ચાલીમાં ન જાય તો મકાન દીઠ બે રૂપિયાનો દંડ નક્કી કરવામાં આવ્યો છે.
નવગુજરાત સમયના રિપોર્ટ અનુસાર, કમિશનર એમ.થેન્નારસને તાજેતરમાં અધિકારીઓ સાથેની બેઠકમાં શહેરમાં સફાઇની જવાબદારી સંભાળતાં સોલિડ વેસ્ટ ખાતાની કામગીરીની સમીક્ષા દરમિયાન સોસાયટી-ચાલીમાં જઇ કચરો એકત્ર કરતી ગાડીઓ નિયમિત અને સમયસર ન આવતી હોવાની ફરિયાદો વ્યાપક બની હોવાનો ઉલ્લેખ કરતાં કચરાની ગાડીઓ માટે શું સિસ્ટમ છે તેની પૃચ્છા કરી હતી. જેમાં સોલિડ વેસ્ટ ખાતાના અધિકારીએ સોસાયટી-ચાલીને એક જગ્યા ગણવામાં આવે છે અને ત્યાં ફેરો ના થાય તો પાંચ રૂપિયા દંડ વસૂલ કરવામાં આવે છે તેવી સ્પષ્ટતા કરતા કમિશનર આશ્ચર્યચક્તિ થઇ ગયાં હતા.
આ સાંભળી કમિશનરે એક સોસાયટીને એક પોઇન્ટ ગણવાની સિસ્ટમને ખોટી ગણાવતાં કહ્યું કે, એક સોસાયટી દીઠ પોઇન્ટ ગણવાને બદલે મકાનો દીઠ પોઇન્ટ ગણવા જોઇએ અને તે પ્રમાણે પેનલ્ટી વસૂલ થવી જોઇએ. તેની સામે એવી દલીલ થઇ હતી કે, ટેન્ડરમાં એ પ્રમાણેની જોગવાઇ નથી. આ સાંભળી કમિશનરે ટેન્ડરની જોગવાઇને બાજુ મૂકી મકાન દીઠ પેનલ્ટી વસૂલ કરવાની તાકીદ કરી હતી.
મ્યુનિ. સૂત્રોએ કહ્યું કે, આ બેઠકમાં આમ તો મકાન દીઠ પાંચ રૂપિયા અને પોઇન્ટ દીઠ પાંચ એ પ્રકારે પેનલ્ટી વસૂલ કરવાની વાત થઇ હતી, પરંતુ કોઇ અકળ કારણોસર અને ડોર ટુ ડોરના કોન્ટ્રાક્ટરો હવે મોટા ગજાના અને ગાંધીનગર સુધી વગ ધરાવતાં થઇ ગયાં હોવાથી તેમની પાસેથી મકાન દીઠ બે રૂપિયા પેનલ્ટી તથા પોઇન્ટ દીઠ પાંચ રૂપિયા પેનલ્ટી વસૂલ કરવાનુ નક્કી થયું છે.
સત્તાવાર સૂત્રોએ જણાવ્યું હતું કે, અગાઉના 766 તથા તાજેતરમાં વધારેલાં બીજા 325 વાહન મળી 1091 વાહનોમાં જીપીએસ લગાવાયા છે તેમજ સાત ઝોનમાં 21 હજાર પોઇન્ટ હતા તેમાં બીજા 10 હજારનો વધારો કરીને 31 હજાર પોઇન્ટ ખાતેથી કચરો એકત્ર કરવામાં આવે તે માટે બે શિફ્ટમાં સઘન દેખરેખ રાખવામાં આવશે. તેનાથી જે કોઇ ઝોનમાં કચરાની ગાડી સોસાયટી-ચાલીમાં ન જાય તો કંટ્રોલરૂમમાં ખબર પડશે અને તેના આધારે કમ્પ્યુટરાઇઝ રિપોર્ટ તૈયાર કરવામાં આવશે અને તે પ્રમાણે પેનલ્ટી વસૂલ કરવામાં આવશે.