અમદાવાદ : અમદાવાદમાં ડોક્ટરના ઘરે ઘરઘાટીએ 7.5 લાખની ચોરી કરી છે. થોડા દિવસ અગાઉ જ નોકરી પર રાખેલા ઘરઘાટીએ મકાનમાં રોકડ રકમની ચોરી કરી છે. ચોરી કર્યા બાદ પિતા વતનમાં બીમાર હોવાનું માલિકને કહીને જતો રહ્યો હતો. થોડા સમય બાદ બેડરૂમના ડ્રોવરમાં જોતા પૈસાની ચોરી થઈ હોવાની જાણ થતાં માલિકે બોડકદેવ પોલીસ સ્ટેશનમાં ચોરીની ફરિયાદ નોંધાવી છે.
પ્રાપ્ત વિગતો મુજબ અમદાવાદના સાયન્સ સિટી રોડ પર રહેતા સુકુમાર મહેતા સ્ટર્લિંગ હોસ્પિટલમાં ડોક્ટર તરીકે ફરજ બજાવે છે. ગત સપ્ટેમ્બર માસમાં તેમણે ઘરઘાટી તરીકે રમેશ નામના વ્યક્તિને કામે રાખ્યો હતો. જે ઘરમાં કચરાપોતું તથા વાસણનું કામ કરતો હતો. ગત તારીખ 25મી સપ્ટેમ્બરે જે દિવસે રમેશને નોકરીએ રાખ્યો તે જ દિવસે ડો.સુકુમારે તેમના બેડરૂમના ડ્રોઅરમાં રોકડા 7.50 લાખ રૂપિયા મૂકીને ડ્રોઅર લોક કરીને ચાવી ડિજિટલ સેફ લોકરમાં મૂકી હતી.
શનિવારે તેમને પૈસાની જરૂર પડતા તેમણે ડ્રોઅર ખોલીને જોયું તો તેમાંથી પૈસા ગાયબ હતા.જેથી તેમણે તપાસ કરાવી ત્યારે જાણવા મળ્યું હતુ કે, તેમના ઘરે ઘરઘાટી તરીકે કામ કરતો રમેશ નામનો વ્યક્તિ ઘરમાંથી 7.50 લાખની રોકડ ચોરીને ફરાર થઈ ગયો હતો. જેથી આ મામલે ડો.સુકુમારે બોડકદેવ પોલીસ સ્ટેશનમાં ફરિયાદ નોંધાવતા પોલીસે ગુનો નોંધી વધુ તપાસ હાથ ધરી છે.