અમદાવાદ : RTE હેઠળ એડમિશન લેનાર વાલીઓ પૈકી અમદાવાદની 4 હાઈપ્રોફાઈલ સ્કૂલમાં 308 વાલીઓ દ્વારા આવકના દાખલામાં દર્શાવેલી આવક કરતાં વધુ આવક હોવા છતાં ખોટી રીતે એડમિશન મેળવ્યું હોવાના પૂરાવા સ્કૂલોએ DEO કચેરીએ આપ્યા છે. આગામી સમયમાં તમામ વાલીઓને બોલાવીને DEO દ્વારા સુનાવણી કરવામાં આવશે. જો સુનાવણી દરમ્યાન વાલીઓ ખોટા સાબિત થશે તો ચાલુ વર્ષના અંત સુધીમાં RTE હેઠળ મેળવેલું એડમિશન રદ કરાશે. જોકે, સ્કૂલો દ્વારા પણ સત્ર શરૂ થયાના 4 મહિના બાદ તપાસ કરવામાં આવી છે.
RTE હેઠળ ગરીબ બાળકોને ખાનગી શાળામાં પ્રવેશ આપવામાં આવે છે. તે માટે આવકનું પ્રમાણપત્ર સહિત અલગ અલગ દસ્તાવેજો જરુરી હોય છે. પરંતુ ઘણીવાર વાલીઓ આવકના દાખલાનું પ્રમાણ પત્ર ખોટી રીતે મેળવી લેતા હોય છે અને તેના આધારે RTE હેઠળ પ્રવેશ પણ મેળવી લેતા હોય છે. જેના કારણે આ વખતે આવકના દાખલા ઉપરાંત ઈન્કમટેક્સ રિટર્ન, પાસબુક, બેંક સ્ટેટમેન્ટ સહિતના પુરાવાઓ પણ મેળવવામાં આવ્યા હતા. ત્યારબાદ પ્રવેશ પ્રક્રિયા કરવામાં આવી હતી. તેમ છતાં કેટલાક વાલીઓએ બોગસ દસ્તાવેજોના આધારે પ્રવેશ મેળવી લીધો હોવાનું સામે આવ્યું છે.
સ્કૂલો દ્વારા થયેલી તપાસમાં 308 વિદ્યાર્થીના વાલીઓએ આવક કરતા ઓછી આવકના દાખલાના આધારે એડમિશન મેળવ્યું હોવાનું સામે આવ્યું છે. સ્કૂલ દ્વારા વાલીઓના આઈટી રિટર્ન DEO કચેરીને આપવામાં આવ્યા છે. DEO દ્વારા તમામ વાલીઓને બોલાવીને સુનાવણી કરવામાં આવશે, જેમાં વાલીની રજૂઆત પણ સંભાળવામાં આવશે. અમદાવાદ શહેરની ઉદગમ, ઝેબર, આનંદ નિકેતન અને ગ્લોબલ ઈન્ડિયા સ્કૂલ દ્વારા સ્કૂલમાં RTE હેઠળ એડમિશન મેળવેલા વિદ્યાર્થીઓના વાલીઓના ડોક્યુમેન્ટની ખાનગી રાહે તપાસ કરવામાં આવી હતી.
આ અંગે અમદાવાદ DEO રોહિત ચૌધરીએ સાથેની વાતચીતમાં જણાવ્યું હતું કે, શહેરમાં ચાર અલગ અલગ સ્કૂલોએ વાલીઓના IT રીટર્ન અમને આપ્યાં છે. જેમાં વાલીની આવક આવકના દાખલા કરતાં વધુ છે. અમે તમામ વાલીઓને રૂબરૂ બોલાવીને સુનાવણી કરીશું. વાલી ખોટા હશે તો વર્ષના અંત સુધીમાં RTE હેઠળથી એડમિશન રદ કરાશે. સ્કૂલ સંચાલક ઈચ્છે તો વાલી પર પોલીસ પ્રક્રિયા પણ કરી શકે છે.