અમદાવાદ : અમદાવાદના નરેન્દ્ર મોદી સ્ટેડિયમ ખાતે 14 ઓક્ટોબરના રોજ ભારત અને પાકિસ્તાન ( IND vs PAK) વચ્ચે આ હાઈ પ્રોફાઈલ મેચ પહેલા જ સ્ટેડિયમની સુરક્ષા વધારી દેવામાં આવી છે. તાજેતરમાં NIAને મોદી સ્ટેડિયમ ઉડાવી દેવાની ધમકી આપી રૂ.500 કરોડની ખંડણી માગતો ઈ-મેઈલ મળ્યો હતો. મામલામાં NIA સાથે અમદાવાદ ક્રાઈમ બ્રાન્ચ પણ તપાસમાં જોડાઈ હતી. જેમાં રાજકોટમાંથી એક યુવકની ધરપકડ કરવામાં આવી છે.
એક રિપોર્ટ મુજબ, ભારત-પાકિસ્તાન મેચ દરમિયાન નરેન્દ્ર મોદી સ્ટેડિયમને બોમ્બથી ઉડાવી દેવાની ધમકી આપવા મામલે મૂળ મધ્ય પ્રદેશના અને હાલ રાજકોટમાં રહેતા કરણ માળીને ક્રાઈમ બ્રાન્ચે ઝડપી લીધો છે. આરોપી યુવક વીડિયો બ્લોગર છે અને માત્ર મજા લેવા માટે સ્ટેડિયમ ઉડાવવાની ધમકી આપી હોવાનું સામે આવી રહ્યું છે. પોલીસે આરોપીના લેપટોપ સહિતના વિવિધ સાધનો જપ્ત કરી લીધા છે.
નોંધનીય છે કે, NIAને હાલમાં ધમકી ભર્યો મેઈલ મળ્યો હતો. જેમાં 500 કરોડની ખંડણીની માગણી કરવામાં આવી હતી. ઉપરાંત ગેંગસ્ટર લોરેન્સ બિશ્નોઈને પણ જેલમાંથી છોડવાની માંગ કરાઈ હતી. જે બાદ સુરક્ષા એજન્સીઓ એલર્ટ પર આવી ગઈ હતી. અમદાવાદમાં મોદી સ્ટેડિયમની સુરક્ષા ચુસ્ત કરી દેવામાં આવી છે.