અમદાવાદ : હાલ નવરાત્રીનો સમય ચાલી રહ્યો છે ત્યારે નવરાત્રી અને ગરબે ઘૂમવામાં મશગુલ પડેલા યુવાધને સાવચેતી રાખવાની ખાસ જરૂરિયાત છે. શરીરમાં પડતી કોઈપણ પ્રકારની તકલીફને નજર અંદાજ કરીને બેદરકારી દાખવવા બદલે તાત્કાલિક ડોક્ટર પાસે પહોંચી અને સારવાર મેળવવી જોઈએ. નવરાત્રિમાં હાર્ટ એટેકની ઘટનાઓ પણ યથાવત જોવા મળી રહી છે. રાજ્યમાં હાર્ટ એટેકે વધુ સાત યુવાનોનો ભેગ લીધો છે. રાજ્યમાં હાર્ટ એટેકથી 7 લોકોના મોત થયા હોવાની વિગતો સામે આવી છે. જેમાં અમદાવાદ સહિતના શહેરોમાં હાર્ટ એટેકથી મોત થયાની વિગતો મળી છે.
હાર્ટ એટેકથી 7 યુવાનોના મોત
રાજ્યમાં વધતા જતા હાર્ટ અટેક અને મોતના કિસ્સાએ ચિંતા વધારી છે. રાજ્યમાં ગરબા રમતા, લગ્નમાં નાચતા વખતે, ક્રિકેટ રમતા રમતા કે પછી જીમમાં કસરત કરતી વખતે હાર્ટ એટેક આવવાની સાથે જ મોતના કિસ્સા સામ આવી રહ્યા છે. ત્યારે રાજ્યમાં એક જ દિવસમાં 7 યુવાનોના હાર્ટ એટેકથી મોત થયા છે.
અમદાવાદમાં હાર્ટ એટેકની ઘટના
પ્રાપ્ત રિપોર્ટ મુજબ, અમદાવાદના વટવા વિસ્તારમાં રહેલા રવિ પંચાલ નામનો 28 વર્ષિય યુવક ગઈકાલે ગરબે રમતા-રમતા અચાનક જ ઢળી પડ્યો હતો.આ યુવક 2 કલાકમાં ગરબા રમીને આવું છું, કહીને ઘરેથી ગયો હતા. જ્યાં તેને ચાલુ ગરબામાં હાર્ટ એટેક આવતા ઢળી પડ્યો હતો.
વડોદરામાં ગરબા રમતી વખતે આવ્યો હાર્ટ એટેક
વડોદરામાં પણ ગરબા રમતી વખતે અચાનક 55 વર્ષીય આધેડને હાર્ટ એટેક આવતા મોત નિપજ્યું છે. જેમાં શહેરના હરણી વિસ્તારના સંસ્કૃતિ એન્કલેવમાં રહેતાં રહીશ શંકરભાઇ રાણાનું હાર્ટ એટેક આવવાથી મોત નીપજ્યું હોવાનું સામે આવ્યું છે.
રાજકોટમાં હાર્ટ એટેકની બે ઘટનાઓ
રાજકોટમાંથી હાર્ટ એટેકથી બે ના મોતના સમાચાર, જેમાં મધ્યસ્થ જેલમાં ચાલુ ફરજ બજાવતા દરમિયાન એટેક આવતા શખ્સનું મોત, જયારે બીજી ઘટનામાં રૈયા રોડ પર રહેતા બિલ્ડરનું બેભાન થયા બાદ મોત નીપજ્યું હોવાના સમાચાર મળ્યા છે.
કપડવંજના યુવકનું હાર્ટ એટેકથી મોત
ખેડાના કપડવંજમાં છઠ્ઠા નોરતે ગરબે ઘૂમતા યુવકનું મોત થયું હોવાનું સામે આવ્યું છે. કપડવંજમા વીર શાહ નામનો 17 વર્ષીય યુવક ગરબે ઘૂમતો હતો. આ સમયે તેને અચાનક નાકમાંથી બ્લીડીંગ થવા લાગ્યું. જેથી તેને હોસ્પિટલ ખસેડવામા આવ્યો હતો.
દ્વારકામાં હાર્ટ એટેકથી બેના મોતની ઘટનાઓ
દ્વારકામાં પણ હાર્ટ એટેકથી બેના મોતની થયાની ઘટનાઓ નોંધાઈ છે, આમ નવરાત્રી માહોલ વચ્ચે હાર્ટ એટેકના 7 કેસ સામે આવતા ખેલૈયામાં ડરનો માહોલ સર્જાયો છે….