અમદાવાદ : ગુજરાત હાઈકોર્ટે બિસ્માર રસ્તા, રખડતા ઢોર, ટ્રાફિક તેમજ પાર્કિંગની સમસ્યા સામે લાલ આંખ કરી છે. ગુજરાત હાઈકોર્ટે બિસ્માર રસ્તા અને રખડતાં ઢોરને લઇ અમદાવાદ મ્યુનિસિપલ કોર્પોરેશનને છેલ્લી તક આપી છે. જાહેરહિતની અરજી પર સુનાવણી દરમિયાન ગુજરાત હાઈકોર્ટે કહ્યું કે, સ્થિતિ સુધારવા અમે એક સપ્તાહનો સમય આપીએ છીએ. સમગ્ર મામલે હાઈકોર્ટમાં આગામી સુનાવણી 7 નવેમ્બરે હાથ ધરાશે.
મીડિયા રિપોર્ટ મુજબ હાઈકોર્ટના આદેશ પર આજે ત્રણ ઉચ્ચ અધિકારીઓ AMCના મ્યુનિસિપિલ કમિશનર, પોલીસ કમિશનર તેમજ શહેરી વિકાસ વિભાગના પ્રિન્સીપાલ સેક્રેટરી સુનાવણી દરમિયાન કોર્ટમાં હાજર રહ્યા હતા. આ દરમિયાન હાઈકોર્ટે અમદાવાદ પોલીસ કમિશનર, મ્યુનિસિપલ કમિશનર અને પ્રિન્સીપાલ સેક્રેટરીનો ઉધડો લીધો હતો.
જાહેરહિતની અરજી પર સુનાવણી કરતી વખતે હાઈકોર્ટે પોલીસ કમિશનરને આકરા સવાલો કર્યા હતા. હાઈકોર્ટે કહ્યું હતું કે, અમારા નિર્દેશોનું પાલન થઇ રહ્યું નથી. કર્મચારીઓ અને અધિકારીઓને માર પડી રહ્યો છે. પોલીસની જીપની બાજુમાં લોકો લાકડીઓ સાથે ફરી રહ્યા છે. પોલીસ શું ફક્ત આવા લોકોને જોઇ રહી છે? પોલીસ મનપાને રક્ષણ પુરૂ નથી પાડી રહીં, ઢોર પકડતી વખતે અધિકારીઓ પર હુમલા થઈ રહ્યા છે. એલાર્મિંગ સ્થિતી છે તમે શું કરી રહ્યા છો? તમારા ખંભા પર સ્ટાર જુઓ, તમે ન કરી શકતા હોય તો જણાવી દો.
એક અઠવાડિયામાં કામગીરી દેખાવી જોઈએ તો આ તરફ એડવોકેટ જનરલે કોર્ટને ખાતરી આપી છે કે, પ્રિન્સિપાલ સેક્રેટરી કક્ષાએ રોજીંદી મિટિંગ થશે અને કાયદાની મર્યાદામાં રહીને કરાતી કામગીરીનો રોજીંદો રિપોર્ટ તૈયાર કરાશે. વાસ્તવિક રીતે કાયદાની મર્યાદામાં જે પણ કડક પગલાં લેવાના થાય છે તે તમામ પગલાં લેવાશે તેવી એડવોકેટ જનરલ કોર્ટને ખાતરી આપી છે. ત્યારે રાજ્ય સહિત અમદાવાદની તમામ સમસ્યાઓ મુદ્દે પ્રશાસન એક અઠવાડિયામાં શું બદલાવ લાવી શકે છે તે જોવું રહ્યુ.