અમદાવાદ : અમદાવાદીઓને ગ્લો ગાર્ડન જોવા માટે સ્ટેચ્યુ ઓફ યુનિટી સુધી ધક્કો ખાવો નહીં પડે. સાબરમતી રિવરફ્રન્ટને દિવસે દિવસે વધુ સુંદર બનાવવાના પ્રયાસો સાબરમતી રિવરફ્રન્ટ ડેવલપમેન્ટ કોર્પોરેશન લિમિટેડ દ્વારા કરવામાં આવી રહ્યા છે. રિવરફ્રન્ટ પર ફ્લોટિંગ રેસ્ટોરન્ટ, ફુટ બ્રિજ સહિત અનેક આકર્ષણો છે. રિવરફ્રન્ટ દર વર્ષે પતંગોત્સવ સહિત ઉત્સવો પણ ઊજવાતા હોય છે. હવે રિવરફ્રન્ટની સુંદરતા વધારવા માટે સાબરમતી રિવરફ્રન્ટ ડેવલપમેન્ટ કોર્પોરેશન દ્વારા રૂપિયા 10 કરોડનો ખર્ચ કરવામાં આવશે. જેમાં આકર્ષક રંગબેરંગી લાઈટ્સ,ગ્લો ગાર્ડન અને મ્યુઝિકલ ફાઉન્ટેન સહિતના આકર્ષણો ઊભા કરાશે.
સાબરમતી રિવરફ્રન્ટ ડેવલપમેન્ટ લિમિટેડના સૂત્રો પાસેથી મળતી માહિતી અનુસાર સાબરમતી રિવરફ્રન્ટ પર લોકોને વધુ સારું નજરાણું અને ફરવા માટે વધુ આકર્ષણો મળે તે હેતુથી હવે ગ્લો ગાર્ડન બનાવવાનો નિર્ણય લેવામાં આવ્યો છે. સાબરમતી રિવરફ્રન્ટના ફ્લાવર પાર્કમાં 3.5 કરોડના ખર્ચે લાઇટિંગ સાથેનું ગાર્ડન બનાવવામાં આવશે. વિવિધ પ્રકારની રંગબેરંગી લાઇટોની મદદથી તૈયાર કરાશે. જુદી જુદી થીમ પર પ્રાણી-પક્ષી, વૃક્ષ, કાર્ટૂન પાત્ર સહિતની અલગ અલગ કેટેગરીના લાઇટિંગ સ્કલ્પ્ચર તૈયાર કરવામાં આવશે. સ્ટેચ્યુ ઓફ યુનિટીમાં શનિ-રવિ અને તહેવારોની રજા દરમિયાન જે રીતે લોકોમાં કરોડો રૂપિયાના ખર્ચે લાઇટિંગ સાથે બનેલું ગ્લો ગાર્ડન પ્રવાસીઓ માટે આકર્ષણનું કેન્દ્ર બની ગયું છે. હવે અમદાવાદમાં પણ લોકો માટે ગ્લો ગાર્ડન બનાવવાનો નિર્ણય લેવામાં આવ્યો છે.
સાબરમતી રિવરફ્રન્ટ પર ગ્લો ગાર્ડનની સાથે હવે મ્યુઝિકલ ફાઉન્ટેન પણ બનાવવાનો નિર્ણય લેવામાં આવ્યો છે. મ્યુઝિકલ લાઈટ એન્ડ સો સાથે આ મ્યુઝિકલ ફાઉન્ટેન લોકો માટે આકર્ષણનું કેન્દ્ર બનશે. સાબરમતી અટલ ફૂટ ઓવર બ્રિજ નજીક આ મ્યુઝિકલ ફાઉન્ટેન બનાવવામાં આવશે. મ્યુઝિકલ ફાઉન્ટેનમાં રંગબેરંગી લાઈટો સાઉન્ડ સિસ્ટમ સાથે પાણીની છોડો ઉછળે તેવા અદભુત નજારાને હવે અમદાવાદીઓ માણી શકશે.
