અમદાવાદ : ચાઇનીઝ દોરીના વેચાણ પર પ્રતિબંધ હોવા છતાંય બજારોમાં ધૂમ વેચાઈ રહી હોવાનું સામે આવી રહ્યું છે. શહેરકોટડામાં મીટરગેજ રોડ સફલ -10ની દુકાનમાંથી ઝોન-3 એલસીબીએ પ્રતિબંધિત ચાઇનીઝ દોરીના 4320 રીલ ભરેલા ગોડાઉન સાથે વેપારીની ધરપકડ કરી હતી. ઝોન-3 ડીસીપી વિશાખા ડબરાલના તાબા હેઠળની એલસીબીના પીએસઆઈ એમ.બી.ગામિતે બાતમીના આધારે દુકાનમાં દરોડો પાડીને રૂ.5.28 લાખની કિંમતના ચાઇનીઝ દોરીના 4320 રીલ પકડી દુકાનમાલિક બાબુભાઈ જગન્નાથ જયસ્વાલ (ઉં.68, બાપુનગર)ની ધરપકડ કરી હતી.
બાબુભાઈની પૂછપરછમાં જાણવા મળ્યું હતું કે આ જથ્થો તેણે વાપીના વિક્રમસિંગ રાઠોડ પાસેથી મગાવ્યો હતો. બાબુભાઈ ચાઇનીઝ દોરીનાં રીલ રૂ.150થી 200માં છૂટક વેપારીઓને વેચતા હતા. જ્યારે તે વેપારીઓ રૂ.300થી 400માં છૂટકમાં ચાઇનીઝ દોરીનાં રીલ વેચતાં હતાં. પોલીસે બાબુભાઈની ધરપકડ કરીને વિક્રમસિંગને પકડવા તજવીજ શરૂ કરી છે. હાલ આરોપીને શહેરકોટડા પોલીસને સોપી દેવામાં આવ્યો છે. જ્યારે ફરાર આરોપીની તપાસ પણ સ્થાનિક પોલીસને સોપવામાં આવી છે.
