અમદાવાદ : અમદાવાદ શહેરમાં એક બાદ એક ચોરી અને લૂંટ તથા ચીલઝડપના કિસ્સા સામે આવી રહ્યા છે.તેવામાં અમદાવાદના ઉસ્માનપુરા વિસ્તારમાં એક વાહનની ડેકીમાંથી યુવકના ધંધાના 15 લાખ રૂપિયા અજાણ્યા શખ્સો ચોરી કરી ફરાર થઈ ગયા હોવાની ઘટના સામે આવી છે. સમગ્ર મામલે સીસીટીવી સામે આવ્યા છે જેને લઈ વાડજ પોલીસે ગુનો નોંધી તપાસ શરૂ કરી છે.
પ્રાપ્ત વિગતો મુજબ અમદાવાદનાં રાણીપમાં રહેતા શાબાઝ શકીલ કુરેશી તેમના માસીના દીકરાના ત્યાં કામ કરે છે. રાણીપના બકરા મંડીમાં શાબાઝભાઈ નોકરી કરે છે. તેમના ત્યાં પશુઓની લે વેચના નાણાં આંગડિયા પેઢીમાં આવ્યા હતા. તે 15 લાખ રૂપિયા તેઓ સીજી રોડ પર આંગડિયા પેઢીમાં લેવા ગયા હતા. આંગડિયા પેઢીમાંથી નાણાં લઈને શાબાઝ ભાઈ નીકળ્યા અને ઉસ્માનપુરા પહોંચ્યા હતાં. ત્યાં દરગાહ બહાર વાહન પાર્ક કર્યા બાદ તેઓ દરગાહમાં પહોંચ્યા હતા.
થોડીવારમાં દરગાહમાંથી બહાર આવીને જોયું ત્યારે એક્ટિવાની ડેકી ખુલ્લી હતી અને તેમાં રહેલા 15 લાખ રૂપિયા ગાયબ થઈ ગયા હતા. બાઈક ચાલક શખ્સ જ અકસ્માતના બહાને રૂપિયા લઈ ગયો હોવાનું શાબાઝ ભાઈના ધ્યાને આવતા પોલીસને જાણ કરી હતી.વાડજ પોલીસ બનાવની જાણ થતાં તાત્કાલિક સ્થળ પર પહોંચી હતી.પોલીસે સીસીટીવી ફૂટેજ તપાસીને આગળની તપાસ હાથ ધરી છે.