અમદાવાદ : શહેરમાં બેફામ વાહનો ચલાવવા કોઈ નવી વાત નથી, જેને પગલે દરરોજ નિર્દોષ નાગરિકો જીવ ગુમાવી રહ્યા છે. આજે શહેરના પાંજરાપોળ વિસ્તારમાં સહજાનંદ કોલેજ નજીક ડમ્પરચાલકે દીકરાને સ્કૂલે મૂકવા જઈ રહેલી એક્ટિવાચાલક મહિલાને અડફેટે લીધી હતી, જેમાં દહર ભટ્ટ નામના બાળકનું મોત થયું હતું. માતાની નજર સામે જ બાળકનું કચડાવાથી મોત થયું છે. આ મામલે ટ્રાફિક-પોલીસે ગુનો નોંધી તપાસ શરૂ કરી છે.
પ્રાપ્ત રિપોર્ટ મુજબ, અમદાવાદના પાંજરાપોળ વિસ્તારમાં આવેલી સહજાનંદ કોલેજ નજીક એક ટૂ-વ્હીલર અને ડમ્પર વચ્ચે અકસ્માત સર્જાયો હતો. માતા પોતાના દીકરાને સ્કૂલે મૂકવા જઈ રહી હતી તે દરમિયાન ડમ્પરે તેઓના ટૂ-વ્હીલરને એડફેટે લીધું હતું. જેમાં 6 વર્ષના દહર ભટ્ટનું મોત નીપજ્યું છે. જ્યારે ઈજાગ્રસ્ત માતાને સારવાર માટે નજીકની હોસ્પિટલ ખસેડાવામાં આવ્યા છે. અકસ્માતની આ ઘટનાની જાણ થતાં અમદાવાદ શહેર પોલીસ કાફલો સ્થળ પર દોડી આવ્યો હતો અને આગળની કાર્યવાહી હાથ ધરી હતી.