અમદાવાદ : પ્રિ-એક્ટિવ સીમકાર્ડ ગેરકાયદેસર વેચવાના રેકેટમાં ચાર આરોપીઓની ક્રાઈમ બ્રાન્ચે ધરપકડ કરી છે. સીમકાર્ડ ખરીદવા આવતા ગ્રાહકોના ધ્યાન બહાર બે વખત બાયોમેટ્રિક પુરાવા મેળવી તેમના નામે બે સીમકાર્ડ ચાલુ કરાવી એક સીમકાર્ડ બ્લેકમાં વેચતા હોવાના કૌભાંડનો ક્રાઈમ બ્રાન્ચે પર્દાફાશ કર્યો છે. પ્રાથમિક તપાસમાં 49 પ્રિ-એક્ટિવ સિમ કાર્ડ કબજે કરવામાં આવ્યા છે. જે મામલે ચાર આરોપીઓની ધરપકડ કરી ક્રાઈમ બ્રાન્ચે વધુ તપાસ શરૂ કરી છે.
પ્રાપ્ત રિપોર્ટ મુજબ, અમદાવાદ ક્રાઈમ બ્રાન્ચને કૌભાંડની જાણ થતા ફરિયાદના આધારે ચાર આરોપીઓની ધરપકડ કરી છે. પોલીસે ગેરકાયદેસર સીમ વેચનાર તેમજ લોકો સાથે છેતરપિંડી કરનાર મહમદ તલહા ઉર્ફે કબીર મિર્ઝા, કયુમ ઉર્ફે ભૂરા રાઠોડ, અજય રાવળ અને જયેશ ઉર્ફે જય નામના ચાર લોકોની ધરપકડ કરી છે. ચારેય આરોપીઓ માંથી કયુમ ઉર્ફે ભૂરો શાહપુર ચાર રસ્તા અને અજય રાવળ વસ્ત્રાલની નિરાંત ચોકડી પાસે ફૂટપાથ પર છત્રી લગાવી એરટેલ કંપનીના સીમકાર્ડનું વેચાણ કરતા હતા.
આરોપી કયુમ અને અજય સીમકાર્ડ ખરીદવા આવતા ગ્રાહકો પાસેથી આધાર પુરાવા લેતો હતો તેમજ ઓનલાઇન પ્રક્રિયા સમયે બે વખત ફોટોગ્રાફ અને બાયોમેટ્રિક ઇમ્પ્રેશન ની પ્રક્રિયા કરાવતો હતો. જેના દ્વારા તે બે અલગ અલગ સીમકાર્ડ એક્ટિવ કરતો હતો. જેમાંથી એક સીમકાર્ડ ગ્રાહકને આપતો હતો તેમજ અન્ય સીમકાર્ડનું વેચાણ અન્ય આરોપીઓને કરતો હતો.
એક્ટીવ કરેલા સીમકાર્ડ તલહા નામનો મુખ્ય આરોપી અન્ય આરોપી પાસેથી ચાલુ સિમકાર્ડ 300 રૂપિયામાં મેળવી 800 રૂપિયામાં વેચતા હતા. પોલીસની તપાસમાં સામે આવ્યુ કે પ્રિ-એક્ટિવ સિમકાર્ડ સટ્ટા બેટિંગ અને ગેરકાયદે પ્રવૃત્તિમાં વપરાય છે. સાથે જ તલ્હા છેલ્લા એક વર્ષથી ટેલિગ્રામમાં એક ગ્રુપ બનાવી તેનું વેચાણ કરતો હતો અને એક સિમકાર્ડ 2200 રૂપિયા સુધી વેચાણ કર્યા હોવાનું સામે આવ્યું છે.
મહત્વનું છે કે આરોપી છેલ્લા 3 વર્ષથી આ પ્રકારની પ્રવૃત્તિ કરતો હોવાનું સામે આવ્યુ છે. ત્યારે અત્યાર સુધીમાં 2000 થઈ વધુ સિમકાર્ડ આરોપીએ વેચ્યા હોવાનું પોલીસ માની રહી છે. આ સાથે જ ક્રાઈમ બ્રાંચે આવા સિમકાર્ડ ખરીદનાર અને તેનો ઉપયોગ કરનાર આરોપીની શોધખોળ શરૂ કરી તેમની તપાસ શરૂ કરી છે. ત્યારે પોલીસની તપાસમાં શું સામે આવે છે.. તે જોવુ મહત્વનું છે.