અમદાવાદ: અમદાવાદ પોલીસે એક એવા ચોરની ધરપકડ કરી છે કે જે ફક્ત મેડિકલ સ્ટોરમાં જ ચોરીને અંજામ આપતો હતો. જોકે બે લોકો સાથે મળી અમદાવાદ શહેરના અલગ અલગ વિસ્તારના મેડિકલ સ્ટોરોની રેકી કરી રાત્રિના સમયે ત્યાં ચોરી કરતા હતા. પોલીસને સમગ્ર મામલે જાણ થતા એલસીબી ઝોન-1 LCB ની ટીમ દ્વારા એક ચોરની ધરપકડ કરવામાં આવી છે, જ્યારે અન્ય ફરાર ચોરની શોધખોળ હાથ ધરી છે.પોલીસે આરોપીની ધરપકડ કરતા ચોરે 6 ગુના કર્યા હોવાની કબૂલાત કરી છે.
પ્રાપ્ત રિપોર્ટ મુજબ, પોલીસની ગીરફતમાં રહેલ આરોપી યોગેશ પઢિયારની ચોરીના ગુનામાં ઝોન-1 LCB ની ટીમ દ્વારા ધરપકડ કરી છે. આરોપી યોગેશ અને વોન્ટેડ આરોપી કે.કે.લુહાર ભેગા મળીને ફક્ત મેડિકલ સ્ટોરને ટાર્ગેટ કરીને ચોરીને અંજામ આપતા હતા. ઝોન-1 LCB સ્કોર્ડ અને ઘાટલોડીયા પોલીસને એક માહિતી મળી હતી જેના આધારે આરોપી યોગેશ પઢિયારની કાલુપુરથી ધરપકડ કરી તેની પાસે રહેલી એક ગાડી, મોબાઈલ ફોન અને રોકડ 8500 રૂપિયા કબજે કર્યા છે. પકડાયેલા આરોપી યોગેશની પૂછપરછ કરતા શહેરના અલગ અલગ વિસ્તારમાં આવેલા આઠ જેટલા મેડિકલ સ્ટોરમાં ચોરી કરી હોવાની કબૂલાત કરી હતી, જેમાં નવરંગપુરા, વેજલપુર, નારણપુરા, રામોલ, ઘાટલોડીયા સહિતના વિસ્તારોમાં મેડિકલ સ્ટોરમા ચોરીના ગુનાનો ભેદ ઉકેલાયો છે.
પકડાયેલ આરોપી યોગેશ પઢિયાર મૂળ પાલનપુર છે અને અમદાવાદમાં કાલુપુર અંજતા ગેસ્ટ હાઉસમાં રહેતો હતો. આરોપી યોગેશ નર્સિંગનો અભ્યાસ કરેલ છે. જેથી આરોપીની પૂછપરછ કરતા સામે આવ્યું કે મેડિકલ સ્ટોરમા દરરોજનાં રોકડા નાણાનો વ્યવહાર હોવાથી વધુ રોકડ પૈસા મળી રહે છે. મેડિકલ સ્ટોરમાં કીમતી ચીજ વસ્તુઓ નહિ હોવાથી ત્યાં સિક્યુરિટી ઓછી હોય છે એટલે કે દરવાજાને સામાન્ય લોક મરેલા હોય છે. આથી મેડિકલ સ્ટોરને ટાર્ગેટ કરતાં હતાં.
સમગ્ર ગુનાનો ભેદ ઉકેલાયા બાદ પોલીસને એક રીઢા ચોર ગિરફ્તમાં આવતાં વધુ ગુનાનો પણ ભેદ ઉકેલાય તેવી શક્યતા છે. રાતના અંધારામાં ચોરી કરતાં આવા શખ્સ સાથે કેટલાં લોકો સામેલ છે તે પણ પોલીસ તપાસમા ખુલશે.