અમદાવાદ : અમદાવાદમાં બુટલેગરના ત્રાસથી રાણીપના એક યુવકે આપઘાત કર્યો છે. યુવકે આપઘાત કરતાં પહેલા સુસાઇડ નોટ લખી છે. આ અંગે રાણીપ પોલીસે અકસ્માતે મોતનો ગુનો નોંધી તપાસ શરૂ કરી છે.
પ્રાપ્ત રિપોર્ટ મુજબ, અમદાવાદના રાણીપમાં કાળીગામમાં રહેતો 25 વર્ષનો ચિરાગ પ્રતાપે GST ફાટક રેલવે ક્રોસિંગ પાસે ટ્રેન નીચે પડતું મૂકીને આપઘાત કરી લીધો છે. સવારના સમયે ચિરાગે ટ્રેન સામે પડતું મૂકીને આપઘાત કરી લેતા માથું ધડથી અલગ થઈ ગયું છે. બનાવ બનતા આસપાસના લોકો ભેગા થઈ ગયા હતા. પોલીસને જાણ થતાં પોલીસ પણ સ્થળ પર પહોંચી હતી. મૃતક પાસેથી એક સુસાઈડ નોટ પણ મળી આવી છે.
યુવકે સુસાઇડ નોટમાં લખ્યું હતું કે, ‘હું અને મારા પપ્પા બેકસુર છીએ. Sorry My Family. હું તમને છોડીને જાવ છું, પણ હું પોતાને અને મારી ફેમિલીને બેકસુર સાબિત કરવા માટે બીજો કોઈ રસ્તો નથી. માટે આ કરવું પડે છે.’
મળતા રિપોર્ટ મુજબ, એક માસ પહેલા મૃતક યુવકના પિતાએ બુટલેગર વિરુદ્ધ પોલીસ અરજી કરી હતી. આ પછી બુટલેગર તેમના પર અદાવત રાખીને યુવકને પરેશાન કરતો હોવાથી યુવકે આ પ્રકારનું પગલું ભર્યું હોવાનું જાણવા મળ્યું છે.
