અમદાવાદ : દેશના પ્રથમ હાઈ સ્પીડ રેલ કોરિડોરનું કામ પૂરજોશમાં ચાલી રહ્યું છે. દેશની પ્રથમ બુલેટ ટ્રેન ટૂંક સમયમાં મુંબઈ અને અમદાવાદ વચ્ચે ઝડપભેર દોડતી થઈ જશે. ગુજરાત અને મહારાષ્ટ્ર વચ્ચે શરૂ થયેલા આ પ્રોજેક્ટનું કામ ગુજરાતમાં લગભગ પૂર્ણ થઈ ગયું છે. તો ચાલો જાણીએ બુલેટ ટ્રેનનું કામ ક્યાં સુધી પહોંચી ગયું છે અને ક્યારે પૂરું થશે?
પ્રાપ્ત રિપોર્ટ મુજબ, અમદાવાદથી મુંબઈ બુલેટ ટ્રેનનો રૂટ 508 કિલોમીટરનો છે. તેને બનાવવા માટે 1.1 લાખ કરોડ રૂપિયાનો ખર્ચ થવાનો અંદાજ છે. નેશનલ હાઇ સ્પીડ ક્લે કોર્પોરેશન (NHSRCL) એ આ પ્રોજેક્ટની જવાબદારી લીધી છે. 14 સપ્ટેમ્બર, 2017 ના રોજ જાપાન અને ભારતના વડાપ્રધાન દ્વારા આ પ્રોજેક્ટનો પાયો નાખવામાં આવ્યો હતો.
મુંબઈ અને અમદાવાદ વચ્ચે દોડતી બુલેટ ટ્રેન 12 સ્ટેશનો પર ઉભી રહેશે. આ યાદીમાં સાબરમતી, અમદાવાદ, આણંદ, વડોદરા, ભરૂચ, સુરત, બીલીમોરા,વાપી, બાયસર, વિરાર, થાણે અને મુંબઈના નામ સામેલ છે. હાલમાં અમદાવાદથી મુંબઈ જવામાં 7-8 કલાકનો સમય લાગે છે. બુલેટ ટ્રેન શરૂ થયા બાદ આ યાત્રા માત્ર 3 કલાકમાં પુરી કરી શકાશે.
અમદાવાદ-મુંબઈ વચ્ચે બુલેટ ટ્રેન પ્રોજેક્ટનું કામ તેજ ગતિએ ચાલી રહ્યું છે. 11 જાન્યુઆરી, 2025 સુધીમાં 253 કિ.મી વાયાડક્ટ, 290 કિમી ગર્ડર કાસ્ટિંગ અને 358 કિ.મી પિઅરનું કામ પૂર્ણ કરવામાં આવ્યું છે. 13 નદીઓ પર 5 સ્ટીલ બ્રિજ બનાવવામાં આવ્યા છે. મહારાષ્ટ્રની વાત કરીએ તો બુલેટ ટ્રેન પ્રોજેક્ટ હેઠળ BKC અને થાણે વચ્ચે 21 કિલોમીટરની ટનલ બનાવવામાં આવી રહી છે. તેમાં 7 પર્વતીય ટનલનો પણ સમાવેશ થાય છે, જેમાંથી 1 ટનલ બનાવવામાં આવી છે.
જો અહેવાલો પર વિશ્વાસ કરવામાં આવે તો, બુલેટ ટ્રેનનું કામ 2026 સુધીમાં પૂર્ણ થવાની સંભાવના છે. જોકે, તેના ઉદ્ઘાટનની સત્તાવાર તારીખ હજુ સુધી જાહેર કરવામાં આવી નથી. પ્રોજેક્ટ પૂર્ણ કરવાની અંતિમ તારીખ ડિસેમ્બર 2026 નક્કી કરવામાં આવી છે.