અમદાવાદ : આજના સમયમાં હનીટ્રેપ, ઓનલાઈન છેતરપિંડી, સાયબર ફ્રોડ જેવી ઘટનાઓ સતત વધી રહી છે. ત્યારે અમદાવાદના પ્રહલાદનગર વિસ્તારમાં એક વેપારી હનીટ્રેપનો શિકાર બન્યો છે. મુંબઈમાં એક બારમાં મળેલી યુવતીએ વેપારી સાથે મિત્રતા કેળવી હતી અને સલૂનના ધંધામાં મદદ કરવાના બહાને તેમની પાસેથી 10 લાખ રૂપિયા પડાવ્યા હતા. ત્યારબાદ યુવતીએ વેપારીને આપઘાત અને પોલીસ કેસની ધમકીઓ આપીને બળજબરીથી પૈસા પડાવવાનું શરૂ કર્યું હતું. એટલું જ નહીં, યુવતીએ વેપારી પર લગ્ન કરવાનું દબાણ પણ કર્યું હતું અને તેમની મરજી વિરુદ્ધ મંદિરમાં ફૂલહાર પણ કર્યા હતા.
પ્રાપ્ત રિપોર્ટ મુજબ, અમદાવાદ શહેરના હેબતપુરમાં રહેતા અને પ્રહલાદનગર ખાતે સિરામિક રો મટીરીયલ્સને લગતો વેપાર કરતા એક વેપારી હનીટ્રેપનો શિકાર બન્યો છે. આ વેપારી મુંબઈ બારમાં ગયો હશે ત્યારે ત્યાં તેને એક યુવતી મળી હતી. આ યુવતી અને વેપારી વચ્ચે મિત્રતા થઈ હતી. ત્યારબાદ યુવતીએ સલૂનના ધંધામાં મદદના નામે વેપારી પાસેથી 10 લાખ રૂપિયા મેળવ્યા હતા. ત્યારબાદ યુવતીએ વધુ પૈસા પડાવવાની લાલચમાં આપઘાત અને પોલીસ કેસની ધમકી આપી હતી.વેપારીની મરજી વિરુદ્ધ મંદિરમાં ફૂલહાર પણ કર્યા હતા. ત્યારબાદ યુવતી વેપારીને વીડિયો મોકલી બ્લેકમેલ કરી રહી હતી. વેપારીને બ્લેકમેલ કરી 73 લાખ રૂપિયા પણ યુવતીએ પડાવી લીધા હતા.
આ ઘટનાઓ બાદ યુવતીએ વેપારીને ફરી સમાધાન માટે બોલાવ્યા અને મોટી રકમની માંગણી કરી હતી. સતત પૈસા આપી કંટાળી ગયેલા વેપારીએ સાબરમતી પોલીસ સ્ટેશનમાં ફરિયાદ દાખલ કરાવી છે. વેપારીએ જ્યોતિ લાંબા નામની યુવતી સામે ફરિયાદ દાખલ કરાવી છે. પોલીસે આ યુવતી સામે ગુનો દાખલ કરી આગળની કાર્યવાહી હાથ ધરી છે.