અમદાવાદ : અમદાવાદ મ્યુનિસિપલ કોર્પોરેશન (AMC) દ્વારા શહેરની પરિવહન વ્યવસ્થાને લઈને એક ક્રાંતિકારી નિર્ણય લેવામાં આવ્યો છે. હવે અમદાવાદીઓએ AMTS અને BRTSમાં મુસાફરી કરવા માટે અલગ-અલગ ટિકિટ લેવાની પળોજણમાંથી મુક્તિ મળશે. AMCની સ્ટેન્ડિંગ કમિટીએ ‘સિંગલ ટિકિટ વિન્ડો સિસ્ટમ’ને મંજૂરી આપી દીધી છે, જેનાથી લાખો મુસાફરોનો સમય અને શક્તિ બચશે.
પ્રાપ્ત રિપોર્ટ મુજબ, મ્યુનિસિપલ કોર્પોરેશનના સ્ટેન્ડિંગ કમિટી દ્વારા કંપનીને 12 વર્ષ માટે રૂ. 470 કરોડ રૂપિયાનો કોન્ટ્રાક્ટ આપવા અંગેની દરખાસ્તને મંજૂરી આપવામાં આવી છે.આ પ્રોજેક્ટને સાકાર કરવા માટે AMC એ એક ખાનગી કંપનીને જવાબદારી સોંપી છે.જે નવી પદ્ધતિ સંપૂર્ણપણે અમલમાં આવતા અંદાજે 12 મહિના જેટલો સમય લાગશે. ખાનગી કંપનીને 11 વર્ષ માટે આ પ્રોજેક્ટનો કોન્ટ્રાક્ટ આપવામાં આવ્યો છે.
અમદાવાદ શહેરમાં દિન પ્રતિદિન જાહેર પરિવહનની સેવામાં વધારો થઈ રહ્યો છે જેમાં ખાસ કરીને એએમટીએસ અને બીઆરટીએસમાં રોજના પાંચ લાખથી વધારે મુસાફરો મુસાફરી કરી રહ્યા છે. લોકો એક જ ટિકિટ લઈને બસમાં મુસાફરી કરી શકે તેના માટે Integrated Transit Management System (ITMS) અને Automatic Fare Collection System (AFCS) પ્રોજેક્ટ શરૂ કર્યા છે. જે અંતર્ગત એક જ ટિકિટ પર AMTS અને BRTS બસમાં લોકો મુસાફરી કરી શકશે.
સ્ટેન્ડિંગ કમિટીના જણાવ્યા અનુસાર, આ પ્રોજેક્ટનો મુખ્ય ઉદ્દેશ્ય મુસાફરોને સીમલેસ (અડચણ વગરની) મુસાફરી પૂરી પાડવાનો અને શહેરના ટ્રાફિક ભારણને ઘટાડવાનો છે. AMCના આ નિર્ણયથી મેનપાવરમાં ઘટાડો થશે. ઓટોમેટેડ અને ડિજિટલ ટિકિટિંગને કારણે મેનપાવરની જરૂરિયાત ઓછી થશે, જે તંત્ર માટે આર્થિક રીતે ફાયદાકારક રહેશે.