અમદાવાદ: આગામી 2030 કોમનવેલ્થ ગેમ્સના આયોજન લઈને અમદાવાદીઓ માટે હાલ મોટા સમાચાર સામે આવી રહ્યા છે. અમદાવાદ શહેરમાં BRTS, AMTS અને મેટ્રો બાદ હવે વોટર મેટ્રો દોડશે. 2030 કોમનવેલ્થ ગેમ્સ પહેલા આગામી દિવસોમાં અમદાવાદ શહેરમાં વોટર મેટ્રો કાર્યરત થાય તો નવાઈ નહીં. AMC દ્વારા સાબરમતી નદીમાં વોટર મેટ્રો દોડાવવા માટે કામગીરી શરૂ કરવામાં આવી છે.
પ્રાપ્ત રિપોર્ટ મુજબ, આગામી વર્ષ 2030માં અમદાવાદ શહેર કોમનવેલ્થ ગેમ્સની યજમાની કરવા જઈ રહ્યું છે. જેને ધ્યાને લઈને AMC તંત્ર સહિત ગુજરાત સરકાર પણ અમદાવાદના વિકાસ માટે ખાસ ધ્યાન આપી રહી છે. ત્યારે આ વિકાસ કામના ભાગરૂપે હવે અમદાવાદમાં સાબરમતી નદીમાં વોટર મેટ્રો દોડશે તેવી માહિતી સામે આવી છે.
હાલ અમદાવાદ શહેરમાં જાહેર વાહનવ્યવહાર માટે BRTS અને AMTS બસ સેવા તથા મેટ્રો રેલ સેવા ઉપલબ્ધ છે. હવે આ સુવિધામાં વધુ એક ઉમેરો થવા જઈ રહ્યો છે. BRTS, AMTS અને મેટ્રો રેલ બાદ હવે અમદાવાદ શહેરની વચ્ચોવચ આવેલી સાબરમતી નદીમાં હવે વોટર મેટ્રો દોડશે. આ માટે સરકારી તંત્રએ તૈયારીઓ પણ શરૂ કરી દીધી છે.
પ્રથમ તબક્કામાં ફેઝ વન સુધી વોટર મેટ્રો અમદાવાદમાં રહેશે અને બાદમા ગાંધીનગર ગિફ્ટ સિટી સુધી લંબાવવાનું આયોજન છે. એક કરોડના ખર્ચે આ ફિઝિબિલિટી રીપોર્ટ તૈયાર કરવામાં આવી રહ્યો હોવાની વિગતો સામે આવી છે. અમદાવાદની સાબરમતી નદીમાં અગાઉ સી પ્લેન પ્રોજેક્ટ શરૂ કરાયો હતો. જે થોડા સમય સુધી કાર્યરત થયા બાદ બંધ કરવામાં આવ્યો છે.
પ્રાપ્ત માહિતી અનુસાર, અમદાવાદની સાબરમતી નદીમાં વોટર મેટ્રોનું ઇનલેન્ડ વોટરવેઝ ઓથોરિટી ઓફ ઇન્ડિયા દ્વારા કામગીરી થશે. જે માટે સરકારી તંત્રએ કોચી વોટર મેટ્રો કંપનીને ફીઝીબીલીટી રિપોર્ટ માટે ઓર્ડર આપી દીધો છે. આ કોચી વોટર મેટ્રો કંપનીએ નદીમાં વોટર મેટ્રો માટે સ્ટડી રિપોર્ટની કામગીરી શરૂ કરી દીધી છે., જે પ્રોજેક્ટ આગામી 2030 કોમનવેલ્થ ગેમ્સ પહેલા પૂર્ણ થાય તે હેતુથી તંત્રએ આયોજન હાથ ધરાયું છે.
નોંધનીય છે કે, આગામી 2030 કોમનવેલ્થ ગેમ્સને ધ્યાને લઈને AMC તંત્રએ અને રાજ્ય સરકારે પણ અમદાવાદના વિકાસ માટે આ વર્ષે 2026-27ના બજેટમાં પણ વિકાસના કાર્યોની મોટી જાહેરાતો કરી છે, ત્યારે આ વિકાસના કાર્યોમાં હવે સિટીમાં વોટર મેટ્રોની પણ ખાસ જોગવાઈ થવા જઈ રહી છે.