ખેલપ્રેમીઓ માટે ખુશખબર, વસ્ત્રાલમાં સેન્ટ્રલી એસી સ્પોર્ટસ કોમ્પલેક્સ તૈયાર, જાણો કેટલી હશે ફી

અમદાવાદ : અમદાવાદના પશ્ચિમ વિસ્તારમાં નારણપુરા બાદ હવે પૂર્વ વિસ્તારમાં રમતગમત ક્ષેત્રે નવા યુગનો પ્રારંભ કરતા વસ્ત્રાલ સ્પોર્ટ્સ કોમ્પ્લેક્સને આખરે સંચાલન માટે લીલી ઝંડી મળી ગઈ છે. સ્પોર્ટસ કોમ્પલેક્સમાં જકુઝી, સ્ટીમ બાથ, સોના બાથ, જીમ જેવી સુવિધા ઉપરાંત અલગ અલગ 20 રમતો રમી શકાશે.આવતા મહિને લોકો માટે આ કોમ્પલેક્સ ખુલ્લું મૂકવામાં આવી શકે છે.

અમદાવાદ મ્યુનિસિપલ કોર્પોરેશન (AMC)ની રિક્રિએશનલ કમિટીએ 61.67 કરોડના ખર્ચે તૈયાર થયેલા આ સેન્ટ્રલી એસી સ્પોર્ટ્સ હબને આગામી 10 વર્ષ માટે સોફ્ટ ટેનિસ એસોસિએશન ઓફ ગુજરાતને સોંપવાનો મહત્વનો નિર્ણય લીધો છે. વર્ષ 2030 અને 2034ના ઓલિમ્પિક તેમજ આગામી કોમનવેલ્થ ગેમ્સની યજમાની માટે ગુજરાત સરકાર જે રીતે તૈયારી કરી રહી છે, તેવામાં આ વિશ્વસ્તરીય સુવિધા પૂર્વ અમદાવાદના ખેલાડીઓ માટે પાયારૂપ સાબિત થશે.

નવા કરાર મુજબ, એજન્સી દર મહિને AMCને 2 લાખ રૂપિયાનું ભાડું ચૂકવશે, જોકે પ્રોત્સાહન રૂપે એક મહિનાનું ભાડું માફ કરવામાં આવ્યું છે અને વીજ બિલમાં 50 ટકાની રાહત આપવામાં આવી છે. આ કોમ્પ્લેક્સમાં ફૂટબોલ, સ્વિમિંગ, બાસ્કેટબોલ, ટેબલ ટેનિસ, જિમ અને યોગા જેવી આધુનિક સુવિધાઓ ઉપલબ્ધ હશે. સામાન્ય નાગરિકો માટે માસિક ફી 150 રૂપિયા અને બાળકો માટે માત્ર 50 રૂપિયા જેવો રાહત દર રાખવામાં આવ્યો છે, જેથી પૂર્વ વિસ્તારના મધ્યમ વર્ગના યુવાનોને પણ આંતરરાષ્ટ્રીય કક્ષાની ટ્રેનિંગ મળી રહે.

મ્યુનિસિપલ અધિકારીઓના મતે, આ કોમ્પ્લેક્સ માત્ર મનોરંજન માટે નથી, પરંતુ ભવિષ્યના ચેમ્પિયન્સ તૈયાર કરવા માટેનું એક એક્સલેન્સ સેન્ટર બનશે. વસ્ત્રાલ અને તેની આસપાસના વિસ્તારોમાં રમતગમતનું વાતાવરણ પ્રોત્સાહિત કરવા માટે આ પ્રોજેક્ટ ગેમ-ચેન્જર માનવામાં આવે છે. આગામી મહિનાથી આ કોમ્પ્લેક્સ જાહેર જનતા માટે ખુલ્લું મુકાતા જ અમદાવાદ રમતગમતના ક્ષેત્રમાં વધુ એક ડગલું આગળ વધશે.