અમદાવાદ, 28 ફેબ્રુઆરી 2026 : અમદાવાદ મેડિકલ એસોસિએશન (AMA) દ્વારા તબીબી જગતના સભ્યોમાં એકતા, ખેલદિલી અને ભાઈચારો વધારવાના હેતુથી ‘AMA પ્રીમિયર લીગ 2026’ બોક્સ ક્રિકેટ ટૂર્નામેન્ટનું ભવ્ય આયોજન કરવામાં આવ્યું છે. આ વર્ષે આ લીગમાં શહેરની વિવિધ હોસ્પિટલો અને સ્પેશિયાલિટીઝમાંથી 32 થી વધુ ટીમો ઉત્સાહભેર ભાગ લઈ રહી છે.
અમદાવાદ મેડિકલ એસોસિએશન (AMA) દ્વારા આ ટૂર્નામેન્ટનો પ્રારંભ એક ઐતિહાસિક ક્ષણ સાથે થયો હતો. ટૂર્નામેન્ટનો ભવ્ય ઉદ્ઘાટન સમારોહ વાસણી બોક્સ ક્રિકેટ ખાતે યોજાયો હતો. નોંધનીય છે કે,એસોસિએશનના ઇતિહાસમાં પ્રથમ વખત ઉદ્ઘાટન સમારોહ પૂર્વ અમદાવાદમાં નિકોલ ખાતે રાખવામાં આવ્યો હતો. આ પ્રસંગે સંસ્થાના વરિષ્ઠ હોદ્દેદારો અને મહાનુભાવોએ હાજર રહીને ખેલાડી તબીબોનો ઉત્સાહ વધાર્યો હતો.
આ ટૂર્નામેન્ટ અંગે વિગતો આપતા AMA ના માનદ મંત્રી ડૉ. મૌલિક શેઠ જણાવાયું હતું કે, તબીબો પોતાની ક્લિનિકલ જવાબદારીઓ અને વ્યસ્ત શિડ્યુલમાંથી સમય ફાળવીને મેદાનમાં ઉતર્યા છે.આ ઉપરાંત આ સ્પર્ધા લિગ-કમ-નોકઆઉટ ફોર્મેટમાં રમાઈ રહી છે. આગામી અઠવાડિયામાં પૂર્વ અને પશ્ચિમ અમદાવાદના વિવિધ મેદાનો પર ગ્રુપ મેચો રમાશે. આ ટૂર્નામેન્ટનો મુખ્ય હેતુ તબીબોમાં શારીરિક સુસજ્જતા વધારવી, માનસિક તણાવ દૂર કરવો અને પરસ્પર જોડાણ મજબૂત કરવાનો છે.
તેઓએ વધુમાં જણાવ્યું હતું કે આ ટૂર્નામેન્ટમાં એમબીબીએસથી લઈને પોસ્ટ ગ્રેજયુશન સુધીના તમામ ફેકલ્ટીઓના તબીબો ભાગ લઇ રહ્યા છે, આ ઉપરાંત 20 થી લઈને 60 વર્ષના વયના તબીબો ભાગ લઇ રહ્યા છે.વુમન્સ તબીબો માટે અલગ સ્પેશયલ ક્રિકેટ લીગનું આયોજન કરવામાં આવ્યું છે.સમગ્ર મેડિકલ ફ્રેટર્નિટીમાં આ ઇવેન્ટને લઈને ભારે ઉત્સાહ જોવા મળી રહ્યો છે અને મોટી સંખ્યામાં સભ્યો મેચો નિહાળવા ઉમટી રહ્યા છે
“Beyond Scope of Scalpel and Stethoscope” ના સૂત્ર સાથે યોજાયેલી આ ટૂર્નામેન્ટ અમદાવાદના મેડિકલ એસોસિએશનની ગતિશીલતા અને એકતાનું પ્રતીક બની રહી છે. પ્રમુખ ડૉ. જિજ્ઞેશ શાહ અને માનદ મંત્રી ડૉ. મૌલિક શેઠના માર્ગદર્શન હેઠળ સમગ્ર આયોજનને આખરી ઓપ આપવામાં આવ્યો છે.