અમદાવાદ : અમદાવાદના ઓઢવ વિસ્તારમાં એક અત્યંત આઘાતજનક કિસ્સો પ્રકાશમાં આવ્યો છે, જ્યાં પ્રેમ સંબંધના કારણે સર્જાયેલા માનસિક ત્રાસે એક 21 વર્ષીય યુવકનો જીવ લીધો છે. પ્રેમિકાના પિતા દ્વારા આપવામાં આવતી સતત ધમકીઓ અને દબાણને કારણે યુવકે જીવન ટૂંકાવવાનો આત્મઘાતી નિર્ણય લીધો હતો, જેણે સમગ્ર વિસ્તારમાં અરેરાટી ફેલાવી દીધી છે.યુવકને આત્મહત્યા માટે મજબૂર કરનાર ગર્લફ્રેન્ડના પિતા સામે પોલીસ ફરિયાદ નોંધાવવામાં આવી છે.
રિપોર્ટ મુજબ, અમદાવાદના ઓઢવ સ્થિત સુવાસ ઓરમ ફ્લેટમાં રહેતા 21 વર્ષીય યુવકે જાન્યુઆરી 2026માં ગાંધીનગર પાસે આવેલી નભોઈ કેનાલમાં કૂદીને આપઘાત કર્યો હતો. આ ઘટનાની સૌથી ચોંકાવનારી બાબત એ છે કે યુવકે આ પગલું ભરતા પહેલા પોતાની ગર્લફ્રેન્ડ અને તેની બહેનને વીડિયો કોલ કર્યો હતો. વીડિયો કોલ ચાલુ હોવા છતાં, તે ક્ષણિક આવેશમાં દોડીને નર્મદા કેનાલના ધસમસતા પ્રવાહમાં કૂદી પડ્યો હતો. આપઘાત પૂર્વેનો કેનાલ પાસેનો તેનો છેલ્લો વીડિયો પણ સોશિયલ મીડિયા પર સામે આવ્યો છે, જે આ ગંભીર પરિસ્થિતિની સાક્ષી પૂરે છે.
આશ્ચર્યની વાત એ છે કે આ કરુણ ઘટના જાન્યુઆરીમાં બની હોવા છતાં, કાયદાકીય પ્રક્રિયામાં વિલંબ થયો હતો અને લગભગ 4 મહિના બાદ ફરિયાદ નોંધાઈ છે. યુવકના પરિવારે ન્યાય માટે કરેલી રજૂઆતો બાદ હવે ઓઢવ પોલીસે યુવતીના પિતા વિરુદ્ધ આત્મહત્યા માટે દુષ્પ્રેરણા આપવાનો અને માનસિક ત્રાસ ગુજારવાનો ગુનો દાખલ કર્યો છે. હાલ પોલીસ આ મામલે ટેકનિકલ પુરાવાઓ અને વીડિયો ફૂટેજના આધારે વધુ તપાસ કરી રહી છે.