અમદાવાદ : શહેરના બોપલ વિસ્તારમાં બોપલ બ્રિજ નજીક મોડી રાત્રે હિટ એન્ડ રનની ઘટના બની હતી. ટ્રક ચાલકે રોડ ક્રોસ કરતાં યુવકને અડફેટે લેતા તેનું ઘટનાસ્થળે જ મોત નિપજ્યું હતું, આ ઘટનાને પગલે બ્રિજ પાસે લોકોનું ટોળુ એકઠું થઈ ગયું હતું. આ દરમિયાન ટ્રાફિક જામના દ્રશ્યો સર્જાયા હતા.જે બાદ ટ્રક મૂકી ચાલક ફરાર થઈ ગયો હતો. સમગ્ર મામલે એમ ડિવિઝન ટ્રાફિક પોલીસ દ્વારા ટ્રક ચાલક વિરુદ્ધ ગુનો નોંધી કાર્યવાહી કરી છે.
રિપોર્ટ મુજબ, વકીલ સાહેબ બ્રિજ પરથી ઉતરતા ટ્રક ચાલકે એક વ્યક્તિને જોરદાર ટક્કર મારી હતી. અકસ્માત એટલો ભયાનક હતો કે ગંભીર ઈજાઓ થવાને કારણે વ્યક્તિનું ઘટનાસ્થળે જ મોત નીપજ્યું હતું. જ્યારે ચાલક ટ્રક લઈને ફરાર થઈ ગયો હતો. સ્થાનિકોના ટોળા ભેગા થઈ ગયા હતા, જ્યારે એક રિક્ષા ચાલકે ટ્રકચાલકનો પીછો કર્યો હતો પણ ઓગણજ સુધી જતા ત્યાં ટ્રક મૂકીને નાસી ગયો હતો.
ઘટનાની જાણ થતા જ એમ ડિવિઝન પોલીસનો કાફલો તાત્કાલિક સ્થળ પર દોડી આવ્યો હતો.પોલીસે મૃતદેહને પોસ્ટમોર્ટમ અર્થે હોસ્પિટલ ખસેડી આગળની કાયદેસરની કાર્યવાહી હાથ ધરી છે. સમગ્ર મામલે એમ ડિવિઝન ટ્રાફિક પોલીસ દ્વારા ગુનો નોંધી ટ્રકચાલકની ધરપકડ કરવા તજવીજ હાથ ધરી છે.