અમદાવાદ : અમદાવાદમાં કાયદો અને વ્યવસ્થાના લીરેલીરા ઉડાડતો એક ચોંકાવનારો કિસ્સો સામે આવ્યો છે, જેમાં બે મહિના અગાઉ થયેલી મારપીટનો બદલો લેવા માટે એક સગીરને જાહેરમાં નગ્ન કરી દોડાવવામાં આવ્યો હતો. આ સમગ્ર મામલે વાડજ પોલીસે ગુનો નોંધીને પાંચ પૈકીના બે આરોપીઓની ગણતરીના કલાકોમાં જ અટકાયત કરી લીધી છે અને અન્યની શોધખોળ હાથ ધરી છે.
રિપોર્ટ મુજબ, સમગ્ર શહેરભરમાં ચર્ચા જગાવનાર ઘટનાની વિગતે વાત કરીએ તો શહેરના દુધેશ્વર પાસે બે મહિના અગાઉ મોહિત નામના યુવકને સગીર સહિત કેટલાક શખ્સોએ કપડા કાઢીને મારમાર્યો હતો. શર્ટ-પેન્ટ કાઢી મોહિતને બેસાડીને માફી મંગાવી હતી. મોહિતના દંડા અને પટ્ટા વડે મારતા હોવાનો વીડિયો પણ સામે આવ્યો છે. જોકે, તે સમયે ડરના કારણે પોલીસ ફરિયાદ થઈ નહોતી. આ જ અપમાનનો બદલો લેવા રોહિત અને તેના મિત્રો મોકો શોધી રહ્યા હતા.
આ અદાવતને લઈને મોહિતે 8મી જૂને મારમારનાર વ્યક્તિઓ પૈકી એક સગીરને ઇન્કમટેક્સ પાસે ઊભો રાખ્યો હતો. પાન પાર્લર પાસે મોહિત અને તેના ચાર મિત્રએ સગીરને માર મારીને કપડા કઢાવ્યાં હતા. સગીરને નગ્ન હાલતમાં જીવ બચાવવા દોડ્યો તો પાંચેય લોકોએ પીછો કરીને માર્યો હતો. આસપાસના લોકો આવતા પાંચેય ત્યાંથી નાસી ગયા હતા. આ અંગે સગીરના પિતાએ વાડજ પોલીસ સ્ટેશનમાં પાંચેય વિરુદ્ધ ફરિયાદ નોંધાવી છે. પોલીસે ફરિયાદના આધારે બે લોકોની અટકાયત કરી છે અને અન્યની શોધખોળ હાથ ધરી છે.