અમદાવાદ: શહેરના રખિયાલ વિસ્તારમાં સોમવારે મોડી રાત્રે રફ્તારનો કહેરની હચમચાવતી ઘટના સામે આવી છે. રખિયાલના ગરીબ નગર ચાર રસ્તા પાસે એક બેકાબૂ કારે અનેક લોકોને અડફેટે લેતા ગંભીર અકસ્માત સર્જાયો હોવાની વિગતો સામે આવી રહી છે. આ અકસ્માતની કાળજું કંપાવવી ઘટનામાં અંદાજે 4થી 5 લોકોને અડફેટે લીધા હતા. જેમાંથી એક યુવતીનું મોત તથા 3-4 લોકો ગંભીર રીતે ઈજાગ્રસ્ત થયા હોવાની આશંકા સેવાઈ રહી છે, જેને પગલે સમગ્ર વિસ્તારમાં અરેરાટી વ્યાપી ગઈ છે.
પ્રાપ્ત રિપોર્ટ મુજબ, રખિયાલ ગરીબનગર પાસેથી પસાર થઈ રહેલી એક કારના ચાલકને ચાલુ ગાડીએ અચાનક હાર્ટ અટેક આવ્યો હતો. ડ્રાઈવરને અટેક આવતાની સાથે જ તેણે કાર પરનો કાબૂ ગુમાવી દીધો હતો. બેકાબૂ બનેલી આ કારે રસ્તા પરથી પસાર થઈ રહેલા અન્ય વાહનચાલકો અને રાહદારીઓને જોરદાર ટક્કર મારી હતી. અકસ્માત એટલો સર્જાયો હતો કે આસપાસના લોકોમાં ભારે અફરાતફરી મચી ગઈ હતી.અકસ્માતના પગલે 500 થી વધુ લોકોના ટોળા ઉમટી પડતા સ્થિતિ તંગ બની હતી, જેના લીધે 2 એસીપી અને પીઆઈનો મોટો પોલીસ કાફલો ઘટનાસ્થળે દોડી આવ્યો હતો.
આ સમગ્ર દુર્ઘટનામાં એક નિર્દોષ વ્યક્તિએ પોતાનો જીવ ગુમાવ્યો છે. જ્યારે અન્ય 3 થી 4 લોકો આ ટક્કરના કારણે ગંભીર રીતે ઘાયલ થયા છે. ઘટનાની જાણ થતાં જ આસપાસના સ્થાનિક લોકો મદદ માટે દોડી આવ્યા હતા. આસપાસ ભેગા થયેલા લોકોએ તાત્કાલિક પોલીસ અને 108ને જાણ કરી હતી અને 108 દ્વારા ઇજાગ્રસ્તોને હોસ્પિટલ લઈ જવાયા છે.