અમદાવાદ : શહેરમાં ચોમાસા દરમિયાન વરસાદના કારણે ચાલુ બાંધકામ સાઈટો ઉપર દિવાલ પડવાની ઘટનાઓ બનતી હોય છે, ત્યારે અમદાવાદ મ્યુનિસિપલ કોર્પોરેશનના એસ્ટેટ વિભાગ દ્વારા ચોમાસાની શરૂઆત પહેલા ચેકિંગ કરવાનું હોય છે, પરંતુ બે દિવસના વરસાદમાં બાંધકામ સાઈટો પર દિવાલો પડવાની ઘટના બન્યા બાદ હવે તંત્ર જાગ્યું છે. શહેરની કુલ 166 ચાલુ બાંધકામ સાઇટ્સનું સ્થળ નિરીક્ષણ કરવામાં આવ્યું હતું. નિયમોનું પાલન ન કરતી કુલ 11 સાઇટ્સ સામે કડક કાર્યવાહી કરીને રજાચિઠ્ઠી (સ્ટોપ વર્ક) આપવામાં આવી છે.
રિપોર્ટ મુજબ, AMC દ્વારા હાથ ધરાયેલા અભિયાન અંતર્ગત ઉત્તર-પશ્ચિમ ઝોનમાં 45, દક્ષિણ-પશ્ચિમ ઝોનમાં 30, પશ્ચિમ ઝોનમાં 27, મધ્ય ઝોનમાં 2, ઉત્તર ઝોનમાં 18, પૂર્વ ઝોનમાં 35 અને દક્ષિણ ઝોનમાં 9 સહિત કુલ 166 ચાલુ બાંધકામ સાઇટ્સનું સ્થળ નિરીક્ષણ કરવામાં આવ્યું હતું. તપાસ દરમિયાન બેરિકેડિંગ, સ્ટ્રટિંગ (Strutting), ડી-વોટરિંગ પંપિંગ સિસ્ટમ, લેબર કોલોનીની સુરક્ષા, બેઝમેન્ટની સલામતી તેમજ સ્થળ પર એન્જિનિયર અને સુપરવાઇઝર દ્વારા કરવામાં આવતી દેખરેખ સહિત તમામ જરૂરી વ્યવસ્થાની ચકાસણી કરવામાં આવી હતી.ચકાસણી દરમિયાન સલામતીના નિયમોનું પાલન ન કરતી કુલ 11 બાંધકામ સાઇટ્સ સામે કાર્યવાહી કરવામાં આવી છે.
જેમાં સંબંધિત ડેવલપર, એન્જિનિયર અને ક્લાર્ક ઓફ વર્ક્સને શો-કોઝ નોટિસ ફટકારી ખુલાસો માંગવામાં આવ્યો છે તેમજ પૂરતી સલામતી વ્યવસ્થા ન થાય ત્યાં સુધી કામ સ્થગિત રાખવાના આદેશ આપવામાં આવ્યા છે. પશ્ચિમ ઝોનની 5, દક્ષિણ-પશ્ચિમ ઝોનની 3, ઉત્તર-પશ્ચિમ ઝોનની 2 અને ઉત્તર ઝોનની 1 સાઇટ સહિત કુલ 11 સાઇટ્સ સામે રજાચિઠ્ઠી સ્થગિત કરવામાં આવી છે અને બાંધકામ પ્રવૃત્તિ બંધ કરાવવામાં આવી છે. પૂરતી સલામતીની વ્યવસ્થા કરવા તાકીદ સાથે લેબર કોલોની પણ ખાલી કરાવવામાં આવી છે.
શહેરની વચ્ચે બાંધકામ સાઈટો બનાવવામાં આવી રહી છે, ત્યારે આજુબાજુમાં રહેણાંક વિસ્તાર આવેલો હોય છે જેમાં કેટલાક લોકોને હેરાનગતિ થતી હોય છે, ત્યારે એસ્ટેટ વિભાગના અધિકારીઓ બાંધકામ સાઈટો ઉપર તપાસ કરતા નથી જેના કારણે બિલ્ડરો દ્વારા મનમાની કરવામાં આવતી હોય છે. બાંધકામ સાઈટો પર દિવાલ પડવાની આ દુર્ઘટનાઓ વધી રહી છે, ત્યારે એસ્ટેટ વિભાગના અધિકારીઓ કામગીરી બતાવી રહ્યા છે. એસ્ટેટ વિભાગ અને બિલ્ડરો વચ્ચે સાંઠગાંઠ હોવાના પગલે તપાસ ન કરવામાં આવતી હોવાની ચર્ચા છે.
કઈ કઈ સાઈટોની રજા ચિઠ્ઠી અને કામ બંધ
રત્નાંજલિ એલાયસ
સંજય એપાર્ટમેન્ટ
મુદ્રા એપાર્ટમેન્ટ
સૂર્યા-3
બંસરી એપાર્ટમેન્ટ
ત્રિનય અનધ
ધ ઇમ્પ્રેસ
જમનાદાસ હાઉસ
શ્રીધર વાયન
ઓવિયર-2
વેદ ઓસિસ