અમદાવાદ : વસ્ત્રાપુરમાં આવેલી વિખ્યાત ન્યૂ આઈઆઈએમ કેમ્પસની હોસ્ટેલમાં એમબીએની વિદ્યાર્થિનીએ સ્વિગીના ડિલિવરી બોયે અભદ્ર ઈશારા અને અશ્લીલ હરકત સાથે ગંદી કોમેન્ટ કરી હોવાના ગંભીર આક્ષેપ સાથે પોલીસ ફરિયાદ નોંધાવી છે. વસ્ત્રાપુર પોલીસે યુવતી સામે અશ્લીલ હરકત કરનાર સ્વિગીના ડિલિવરી બોય નિપમ દિનેશભાઇ ઠક્કર (ઉ.વ.37, મંગલા ગૌરી રેસિડેન્સી, વ્યાસવાડીની બાજુમાં, વાડજ)ની ધરપકડ કરી આગળની કાર્યવાહી હાથ ધરી છે.
મળતી માહિતી મુજબ, અંધજન મંડળ પાસે આવેલા ન્યૂ IIM કેમ્પસમાં છેલ્લા પાંચ મહિનાથી અભ્યાસ કરતી એક વિદ્યાર્થિનીએ પોલીસ ફરિયાદ નોંધાવી હતી કે, ગત 15 ઓગસ્ટે સાંજે 7 વાગ્યાની આસપાસ તે કેમ્પસના રૂમમાં હાજર હતી. આ દરમિયાન તેણીએ સ્વિગી એપ્લિકેશન મારફતે રેસ્ટોરન્ટમાંથી ખાવાનું મંગાવ્યું હતું. એપ્લિકેશનમાં ડિલિવરી બોય તરીકે નિપમનું નામ દર્શાવાયું હતું. રાત્રે આશરે 8 વાગ્યે એક અજાણ્યા નંબર પરથી ફોન આવ્યો હતો, પરંતુ વિદ્યાર્થીનીએ ફોન ઉપાડ્યો નહોતો. બાદમાં ઓર્ડર અંગેનો ફોન હોવાનું માની તે નીચે ગ્રાઉન્ડ ફ્લોર પર ગઈ હતી.
થોડીવાર બાદ ફરી એ જ નંબર પરથી ફોન આવ્યો હતો. ફોન કરનારે પોતે ફૂડ ઓર્ડર લઈને બીજા માળે આવ્યો હોવાનું કહી વિદ્યાર્થીનીને ઉપર આવવા કહ્યું હતું. વિદ્યાર્થીનીએ તેને પહેલા માળે આવવા કહ્યું હતું. ત્યારબાદ વિદ્યાર્થીની પહેલા માળે પહોંચી ત્યારે ડિલિવરી બોય નિપમ સીડી પાસે ઊભો હતો. ફરિયાદ મુજબ, વિદ્યાર્થીનીને જોઈ આરોપીએ તેના દેખાવ અંગે અયોગ્ય ટિપ્પણી કરી હતી. ફરિયાદમાં આક્ષેપ છે કે, આરોપીએ ખાવાના પાર્સલની આડમાં અશોભનીય હરકત કરી હતી અને વિદ્યાર્થીની સામે અભદ્ર ઇશારા પણ કર્યા હતા.
ફરિયાદમાં જણાવ્યા પ્રમાણે, ડિલિવરી બોયે ફૂડ પેકેટ વિચિત્ર રીતે રાખ્યું હતું અને યુવતીને જોઇને તેણે પોતાના કપડાં પણ અયોગ્ય રાખ્યા હતા. આટલું જ નહિ, તેણે યુવતી તરફ અભદ્ર ઈશારા કર્યા હોવાનો આક્ષેપ કર્યો છે. આ હરકતથી ગભરાઈ ગયેલી યુવતી તાત્કાલિક પોતાના રૂમમાં પરત ફરી હતી અને પોતાની મિત્રને ફોન કરીને સમગ્ર ઘટનાની જાણ કરી હતી. બંને મિત્રો તેની પાસે પહોંચ્યા બાદ યુવતીએ ઘટના જણાવી હતી. ત્યારબાદ આઈઆઈએમના મેનેજમેન્ટના સભ્યોને જાણ કરવામાં આવી હતી.
યુવતી પોતાની મિત્ર તથા ઈન્ટરનલ કમ્પ્લેઈન્ટ કમિટીના સભ્ય-સચિવ સાથે પોલીસ સ્ટેશન પહોંચી હતી અને ફરિયાદ નોંધાવી હતી. ફરિયાદમાં ડિલિવરી બોયનું નામ નિપમ હોવાનું જણાવાયું છે જ્યારે તેનું પૂરું નામ અને સરનામું ફરિયાદી પાસે ઉપલબ્ધ નથી. પોલીસે યુવતીની ફરિયાદને આધારે તપાસ હાથ ધરી છે. જોકે, પોલીસને ડિલિવરી બોયના મોબાઇલ નંબરને આધારે આ શખ્સને ઝડપી લીધો છે. આઇઆઇએમ કેમ્પસ જેવી સલામત જગ્યામાં પણ યુવતીઓ સલામત નહિ હોવાની ઘટનાથી કેમ્પસમાં ચિંતાનું મોજું ફરી વળ્યું છે.