અમદાવાદ : વધુ એક સરકારી કર્મચારી લાંચ લેતા ઝડપાયો છે. અમદાવાદમાં રિક્ષામાં બે પેટી દારૂ લઈ જતાં વ્યક્તિને પકડીને એક પોલીસ કોન્સ્ટેબલે કેસ નહીં કરવાના 2.25 લાખ રૂપિયા માંગ્યા હતાં. ફરિયાદીએ ACBનો સંપર્ક કરતાં જ ACBએ છટકુ ગોઠવીને આરોપી પોલીસકર્મી અને વહીવટદારને એક લાખની લાંચ લેતા ઝડપી પાડ્યા હતાં.
મળતી વિગતો પ્રમાણે નારણપુરા પોલીસ સ્ટેશનમાં ફરજ બજાવતા કોન્સ્ટેબલ પ્રકાશ રબારીએ રિક્ષામાં દારુ લઈ જવાતો હોવાનું માલુમ પડતા કેશ નહીં કરવાની બાંહેધરી આપીને રૂપિયા 2.25 લાખ રૂપિયાની માગણી કરી હતી. આ પછી જ્યારે લાંચની રકમ માટે 1 લાખ રૂપિયા આપવાનું નક્કી કરાયું હતું તે જ સમયે ACB દ્વારા છટકું ગોઠવીને લાંચ લેતા પોલીસ કોન્સ્ટેબલને પકડી લેવામાં આવ્યો હતો.
લાંચના એક લાખ રૂપિયા પણ કોન્સ્ટેબલ પાસેથી ACB દ્વારા રિકવર કરવામાં આવ્યા છે. કોન્સ્ટેબલે 5 લાખ રૂપિયાની લાંચ માગી હતી જોકે, પછી વાટાઘાટો કરતા વાત 2.25 લાખ પર આવીને અટકી હતી. આ પછી એક લાખ રૂપિયા જે પાનના ગલ્લાવાળાના ત્યાં મૂકાવવામાં આવ્યા હતા તેની પણ ધરપકડ કરવામાં આવી હોવાની વિગતો મળી રહી છે.