અમદાવાદ : એસ જી હાઈવે પર ગત 22 ઓગસ્ટની મધરાતે સર્જાયેલા હિટ એન્ડ રન અકસ્માતનો ભેદ સોલા હાઈકોર્ટ પોલીસે ઉકેલી આરોપીની ધરપકડ કરી છે. અકસ્માતના શંકાસ્પદ રૂટ પરના આશરે 200 સીસીટીવી કેમેરાના ફૂટેજ તપાસીને પોલીસે 29 વર્ષીય કાર ચાલકની ધરપકડ કરી છે તેમજ અકસ્માતમાં વપરાયેલી કાર પણ જપ્ત કરી છે.
રિપોર્ટ મુજબ, ગત 22મી ઑગસ્ટની રાતે એસ જી હાઈવે પર ગોતા ખાતે વોડાફોન ટાવર કોમ્પલેક્સ સામે જાહેર રોડ પર અજાણ્યા ફોર-વ્હીલર ચાલકે એક્ટિવા ટુ-વ્હીલરને ટક્કર મારી હતી. અકસ્માતમાં ફરિયાદી સહિત તેમના બે મિત્રોને ગંભીર ઈજાઓ પહોંચી હતી. અકસ્માત બાદ કારચાલક પોતાની વેગનર કાર સાથે સ્થળ પરથી ફરાર થઈ ગયો હતો.આ બનાવ અંગે એસજી-1 ટ્રાફિક પોલીસ સ્ટેશનમાં ભારતીય ન્યાય સંહિતા (BNS) તથા મોટર વાહન અધિનિયમની વિવિધ જોગવાઈઓ હેઠળ ગુનો નોંધવામાં આવ્યો હતો.
ઉચ્ચ પોલીસ અધિકારીઓની સૂચનાને પગલે સોલા હાઇકોર્ટ પોલીસ સ્ટેશનની ટીમે પણ આ કેસની સમાંતર તપાસ શરૂ કરી હતી. તપાસ ટીમે ઘટનાસ્થળ અને શંકાસ્પદ વાહનની અવરજવર વાળા માર્ગો પરના આશરે 200 સીસીટીવી કેમેરાના રૅકોર્ડિંગ્સની ઝીણવટભરી ચકાસણી કરી હતી.સીસીટીવી ફૂટેજ અને હ્યુમન ઇન્ટેલિજન્સ(બાતમીદારો)ની મદદથી પોલીસને શંકાસ્પદ કાર અને તેના ચાલકની ભાળ મળી હતી. પોલીસે ચાણક્યપુરીના માધવ ગાર્ડન પાસે રહેતા 29 વર્ષીય આરોપી કિશન ઉર્ફે પોચીની અટકાયત કરી પૂછપરછ હાથ ધરી હતી.
પોલીસના જણાવ્યાનુસાર, પૂછપરછ દરમિયાન આરોપીએ અકસ્માતમાં પોતાની સંડોવણી હોવાની કબૂલાત કરી હતી. ત્યારબાદ પોલીસે અકસ્માતમાં વપરાયેલી કાર કબજે લીધી હતી. સોલા હાઇકોર્ટ પોલીસે સીસીટીવી વિશ્લેષણ અને બાતમીદારોના નેટવર્કથી આ કેસ ઉકેલ્યો હતો.