અમદાવાદ : અમદાવાદ શહેરમાં ગંભીર ગુનાઓને રોકવા અને તે અંગે ત્વરિત તથા અસરકારક કાર્યવાહી કરવા માટે પોલીસ કમિશનર અનુપમસિંહ ગહેલોત દ્વારા એક મહત્વપૂર્ણ વહીવટી નિર્ણય લેવામાં આવ્યો છે. જેમાં અમદાવાદ શહેર ક્રાઈમ બ્રાન્ચના પૂર્વ અને પશ્ચિમ વિસ્તારમાં કુલ 4 નવા વિશેષ યુનિટ શરૂ કરવામાં આવ્યા છે. આ અંતર્ગત પૂર્વ વિસ્તારમાં વટવા ગામ અને ઓઢવ સિંગરવા ચોકી ખાતેના 2 યુનિટ તાત્કાલિક અસરથી કાર્યરત કરી દેવામાં આવ્યા છે, જ્યારે પશ્ચિમ વિસ્તારમાં ચાંદખેડા અને બોડકદેવ ખાતે ટૂંક સમયમાં અન્ય બે યુનિટ શરૂ કરવામાં આવશે.
રિપોર્ટ મુજબ, અમદાવાદ શહેરની વધતી જતી વસ્તી, આવાસ, ભૌગોલિક વિસ્તાર તેમજ ઔદ્યોગિક અને વ્યાપારી પ્રવાહોને ધ્યાનમાં રાખીને, શહેર પોલીસ કમિશનર અનુપમ સિંહ ગેહલોતે શહેરના વિવિધ વિસ્તારોમાં ક્રાઈમ બ્રાન્ચના ચાર નવા યુનિટ શરૂ કરવાનો નિર્ણય લીધો છે. આ પૈકીના બે યુનિટ ગત 25 સપ્ટેમ્બરથી કાર્યરત થઈ ચૂક્યા છે. યુનિટ-1 (દક્ષિણ યુનિટ) વટવા ગામ પોલીસ આઉટપોસ્ટ ખાતે અને યુનિટ-2 (પૂર્વ યુનિટ) ઓઢવના સિંગરવા આઉટપોસ્ટ ખાતે કાર્યરત કરવામાં આવ્યું છે.જ્યારે પશ્ચિમ વિસ્તારમાં ચાંદખેડા અને બોડકદેવ ખાતે ટૂંક સમયમાં અન્ય બે યુનિટ શરૂ કરવામાં આવશે.
અમદાવાદ શહેરમાં કયા યુનિટ હેઠળ કયા ક્યા વિસ્તારોના પોલીસ સ્ટેશન આવશે?
અમદાવાદ પૂર્વ-યુનિટ 1 (વટવા ગામ): PI જેબલિયા અને તેમની ટીમ વટવા, ઇસનપુર, નરોલ, GIDC વટવા, રામોલ અને ખોખરા પોલીસ સ્ટેશન વિસ્તારની કામગીરી સંભાળશે.
અમદાવાદ પૂર્વ-યુનિટ 2 (સિંગરવા ચોકી): PI ધાખડા અને તેમની ટીમ ઓઢવ, નિકોલ, નરોડા, કૃષ્ણનગર, સરદારનગર, બાપુનગર, રખિયાલ અને અમરાઈવાડી વિસ્તાર પર ચાંપતી નજર રાખશે.
અમદાવાદ પશ્ચિમ-યુનિટ 3 (ચાંદખેડા): આ યુનિટ હેઠળ ચાંદખેડા, મોટેરા, સાબરમતી, રાણીપ, નારણપુરા, વાડજ અને એરપોર્ટ જેવા સંવેદનશીલ વિસ્તારો આવરી લેવાશે.
અમદાવાદ પશ્ચિમ યુનિટ 4 (બોડકદેવ): આ યુનિટ બોડકદેવ, વસ્ત્રાપુર, સોલા, ઘાટલોડિયા, ગુજરાત યુનિવર્સિટી, સરખેજ અને વેજલપુર વિસ્તારમાં ગુના નિયંત્રણની જવાબદારી નિભાવશે.
નવા યુનિટ્સની સ્થાપના થવાથી પૂર્વ અમદાવાદના ઔદ્યોગિક અને સંવેદનશીલ વિસ્તારોમાં ક્રાઇમ બ્રાન્ચની સક્રિય ફિલ્ડ હાજરી વધશે. આ સિવાય સ્થાનિક પોલીસ સ્ટેશનોને પણ ક્રાઇમ બ્રાન્ચ તરફથી ટેકનિકલ અને ઓપરેશનલ ધોરણે વધુ મજબૂત સહયોગ મળશે. ક્રાઇમ બ્રાન્ચ હવે ગુના બન્યા પછી તપાસ કરવા ઉપરાંત ગુના બનતા અટકાવવા એટલે કે ‘પ્રિવેન્ટિવ પોલીસિંગ’ પર વધુ ભાર મૂકશે.
આ નવા યુનિટ્સ કાર્યરત થતાં જ બૂટલેગરો, જુગારીઓ, ડ્રગ્સ માફિયાઓ તેમજ વાહન ચોરી કરતી સંગઠિત ગેંગના સાગરિતો પર પોલીસની સીધી અને કડક નજર રહેશે. ગુનાહિત પ્રવૃત્તિઓ સાથે સંકળાયેલા અસામાજિક તત્વો સામે આકરાં કાનૂની પગલાં ભરીને શહેરને વધુ સુરક્ષિત બનાવવાની દિશામાં ક્રાઇમ બ્રાન્ચે ચક્રો ગતિમાન કર્યા છે.