અમદાવાદ : અમદાવાદીઓ જાહેર રસ્તા પર વાહન પાર્ક કરતા પહેલા સાવધાન રહેજો. કારણ કે ટ્રાફિક પોલીસ દ્વારા તો વાહન લોક કરીને દંડાત્મક કાર્યવાહી કરવામાં આવે છે. પરંતુ હવેથી AMC દ્વારા પણ સ્પેશિયલ ડ્રાઇવ શરૂ કરવામાં આવી છે. જાહેર રસ્તા પર અડચણ રૂપ રહેલા વાહનો તેમજ જાહેર રોડ પર લાંબા સમયથી પાર્ક થયેલા વાહનો લોક કરી દંડનાત્મક કાર્યવાહી કરવામાં આવી રહી છે.
AMC દ્વારા જાહેર રોડ રસ્તા પર દબાણ, જંક્શન પરના દબાણ તથા ટ્રાફિકમાં તથા રાહદારીઓને અડટણ રૂપ દબાણ હટાવાની કામગીરી યુદ્ધના ધોરણે ચાલી રહી છે. તો બીજી તરફ જાહેર રસ્તા પર ગંદકી અને ઉપદ્રવ કરતા એકમ તેમજ પ્રતિબધિત પ્લાસ્ટિક ઉપયોગ કરતા એકમો સામે AMC દ્વારા લાલ આંખ કરવામાં આવી રહી છે.
આ સાથે વાહનોને AMCના પાર્ક એરિયામાં મૂકવાની સુચનાઓ આપવામાં આવી રહી છે. AMC દ્વારા શહેરના ફલાય ઓવર બ્રિજ અને ખુલ્લા પ્લોટમાં પાર્કિગ વ્યવસ્થા ઉભી કરાઈ છે. તેમ છતા જાહેર રોડ પર વાહન પાર્ક થતા ટ્રાફિકની સમસ્યા ઉભી થઇ રહી છે તેવામાં AMC દ્વારા વિશેષ ડ્રાઈવ ચાલી રહી છે. જે અંતર્ગત સાત ઝોનમાં તમામ વોર્ડમાં જાહેર રસ્તા પર રહેલા વાહન લોક કરવા ત્યાર બાદ મોટા દંડ સાથે વાહન લોક ખોલવામાં આવી રહ્યા છે.
આથી અમદાવાદીઓ સાવધાન થઇ જજો, જાહેર રસ્તા પર વાહન પાર્ક હશે અને ટ્રાફિક પોલીસ નહી હોય તો AMC ટીમ દ્વારા તમારુ વાહન લોક કરીને દંડનાત્મક કાર્યવાહી કરી શકે છે. એટલે કે હવે લોકોને નડતરરૂપ થાય કે રસ્તો રોકાતો હોય તે રીતે વાહન પાર્ક કર્યા હશે તેમની સામે જરુરી કાર્યવાહી આ ટીમ દ્વારા કરવામાં આવશે.