અમદાવાદ : ગુજરાત સહિત દેશભરમાં બોક્સિંગ ચેમ્પિયનશિપમાં સિટી,ઝોન અને સ્ટેટ લેવલે જુદી-જુદી સ્પર્ધા યોજવામાં આવે છે. ગુજરાત સ્ટેટ બોક્સીંગ એસો.દ્વારા આયોજીત ચૌથી સબ જુનિયર બોઇઝ અને ગર્લ્સ વેસ્ટ ઝોન બોક્સિંગ ચેમ્પિયનશિપ તા. 5 થી 7 માર્ચ, 2024 દરમ્યાન અમદાવાદના નિકોલ સ્પોર્ટ્સ કોમ્પ્લેક્ષ ખાતે યોજાશે. જેમાં ગુજરાત ઉપરાંત મહારાષ્ટ્ર, ગોવા તથા દિવ, દમણ, દાદરાનગર હવેલીના બોક્સર્સ ભાગ લેશે. બંને ગ્રુપમાં 14 વજન ગ્રુપમાં સ્પર્ધાઓ યોજાશે.
પ્રાપ્ત વિગતો મુજબ અમદાવાદના નિકોલ સ્પોર્ટ્સ કોમ્પ્લેક્ષ ખાતે સ્પોર્ટ્સ ઓથોરીટી ઓફ ગુજરાતના સહયોગથી આ સ્પર્ધાઓનું ઉદ્ઘાટન તા.5 માર્ચના રોજ સવારે 11:00 વાગે સ્પોર્ટ્સ ઓથોરીટી ઓફ ગુજરાતના ડાયરેક્ટર જનરલ આર.એસ. નિનામાના વરદહસ્તે થશે.તા.6 માર્ચના રોજ સ્પોર્ટ્સ ઓથોરીટી ઓફ ગુજરાતના ચીફ કોચ એલ.પી બારિયા અતિથિ વિશેષ તરીકે ઉપસ્થિત રહી વિજેતાઓને મેડલ્સ એનાયત કરશે. તા.7 માર્ચના રોજ યોજાનાર પૂર્ણાહુતિ સમારંભના મુખ્ય મહેમાન પદે સ્પોર્ટ્સ ઓથોરીટી ઓફ ગુજરાતના સેક્રેટરી આઈ.આર.વાળા ઉપસ્થિત રહી વિજેતાઓને મેડલ્સ તથા બેસ્ટ બોક્સર્સ ટ્રોફી એનાયત કરશે.
આ સ્પર્ધાના ડાયરેક્ટર કોમ્પીટીશન તરીકે ગુજરાત સ્ટેટ બોક્સીંગ એસોના મહામંત્રી દિલીપ બ્રહ્મભટ્ટ રહેશે. જ્યારે ઓર્ગેનાઇઝીંગ સેક્રેટરી તરીકે ગોવાના સેક્રેટરી કુ.દનુષ્કા દ’ગામાની નિમણુંક કરવામાં આવી છે.
તમને જણાવી દઈએ કે ગુજરાત સ્ટેટ બોક્સિંગ એસો. દ્વારા અગાઉ 2009 તથા 2018 માં સીનિયર ભાઈઓ માટેની વેસ્ટ ઝોન બોક્સિંગ સ્પર્ધા સુરત ખાતે યોજવામાં આવી હતી. ત્યારબાદ માર્ચ 2022 માં સબ જુનિયર બોઇઝ તથા ગર્લ્સ માટેની વેસ્ટ ઝોન બોક્સિંગ ચેમ્પિયનશિપનું આયોજન અમદાવાદમાં કરવામાં આવ્યું હતું.