અમદાવાદ: અમદાવાદ શહેરમાં ફિલ્મોને ટક્કર મારે એવો બદલાનો કિસ્સો પ્રકાશમાં આવ્યો છે. પિતાની હત્યાનો બદલો યુવકે 22 વર્ષે લીધો હોવાની ઘટના સામે આવી છે. રાજસ્થાનના યુવકે પિતાની હત્યા કરનાર વૃદ્ધને અમદાવાદમાં અકસ્માત કરી મોતને ઘાટ ઉતાર્યા હોવાનો ખુલાસો થયો છે. જોકે, આ મામલે એન ડિવિઝન ટ્રાફિક પોલીસ દ્વારા ગુનો નોંધી બોલેરો ચાલકની ધરપકડ કરી હતી.
પ્રાપ્ત રિપોર્ટ મુજબ, ગત 1 ઓક્ટોબરના રોજ બોડકદેવ જ્ઞાનબાગ પાર્ટી પ્લોટ પાસે મૂળ રાજસ્થાનના રહેવાસી અને હાલ થલતેજ ટાઇટેનિયમ સ્ક્વેર ખાતે રહેતા નખતસિંહ ભાટી સાઇકલ લઇને પસાર થતા હતા. તે દરમિયાન પાછળથી પૂરપાટ ઝડપે બોલેરો કારના ચાલકે તેમને ટક્કર મારી અકસ્માત કર્યો હતો. જેમાં તખતસિંહનું ઘટના સ્થળ પર જ મોત નીપજ્યું હતું. એન ડિવિઝન ટ્રાફિક પોલીસે આ મામલે ગુનો નોંધી તપાસ શરૂ કરી હતી.
પોલીસે સીસીટીવી ફૂટેજ અને હ્યુમન સોર્સીસના આધારે ગોપાલસિંહ હરીસિંહ ભાટી (ઉ.વ.30) (રહે. રાજપૂત વાસ, ગામ- અજાસર, તા- પોખરણ, જિ- જૈસલમેર, રાજસ્થાન)ની ધરપકડ કરી હતી. આરોપીની કડક પૂછપરછ કરતા ગોપાલસિંહ ભાટીએ બોલેરો કાર નખતસિંહને મારી નાખવાના ઇરાદે પૂરઝડપે ચલાવી સાઇકલને પાછળથી ટક્કર મારી ઉપર ચડાવી દીધી હતી. જોકે, પોલીસે આ મામલે મૃતક તખતસિંહ અને આરોપી ગોપાલસિંહ વચ્ચે જુની અદાવતને લઇ આરોપીએ હત્યા કરી હોવાનું જાણવા મળ્યું હતું.
સમગ્ર મામલે પોલીસ તપાસમાં સામે આવ્યું હતું કે મૃતક અને આરોપી વચ્ચે છેલ્લા કેટલાક સમયથી અદાવત ચાલતી હતી. વર્ષ 2002માં મૃતક નખતસિંહ ભાટીએ રાજસ્થાનમાં બોલેરો ચાલક ગોપાલ સિંહ ભાટીના પિતાની હત્યા કરી હતી. ત્યારથી બંને વચ્ચે અદાવત ચાલતી હતી. જેમાં 22 વર્ષે ગોપાલ સિંહે પિતાની હત્યાનો બદલો લીધો છે. એન ડિવિઝન ટ્રાફિક પોલીસે અકસ્માતની તપાસ દરમિયાન મોટી સફળતા હાથ લાગી છે. હાલ બોડકદેવ પોલીસે આ સમગ્ર મામલે તપાસ શરૂ અને વધુ કાર્યવાહી શરૂ કરી છે.