અમદાવાદ: સાબરમતી રિવરફ્રન્ટ ડેવલપમેન્ટ પ્રોજેક્ટ હંમેશા અમદાવાદના લોકો માટે પસંદગીનું સ્થળ રહ્યું છે. સાબરમતી રિવરફ્રન્ટ પ્રોજેક્ટ દ્વારા લોકોના આનંદ માટે ઘણી જાહેર મનોરંજનની સુવિધાઓ બનાવવામાં આવી છે.પરંતુ આને પણ અમદાવાદ મ્યુનિસિપલ કોર્પોરેશન અને સત્તાધીશોએ કમાણીનું સાધન બનાવી દીધા છે.સાબરમતી રિવરફ્રન્ટ ડેવલપમેન્ટ કોર્પોરેશન લિમિટેડ દ્વારા એકાએક પાછલા બારણે ચારે રિવરફ્રન્ટ પાર્કની ફીમાં બે ગણો વધારો કરી દેવાયો છે.
પ્રાપ્ત રિપોર્ટ મુજબ, અમદાવાદના રિવરફ્રન્ટનાં ગાર્ડનની ફીમાં તોતિંગ વધારો ઝીંકી દેવાયો છે.ગાર્ડનમાં એન્ટ્રી ફી ડબલ કરી દેવામાં આવી છે. બાર વરસની ઉપરની વ્યક્તિની ટીકીટ 10 રૂપિયાથી વધારી 20 રૂપિયા કરી દેવાઇ છે. જ્યારે 12 વર્ષથી નીચેની વ્યક્તિ માટે 5 રૂપિયાથી વધારી 10 રૂપિયા ફી કરવામાં આવી છે.સાબરમતી રિવરફ્રન્ટની કમિટીમાં મ્યુનિસિપલ કમિશનર અને ભાજપના સત્તાધીશોએ પાછલા બારણે કરવામાં આવેલા ભાવ વધારાને મંજૂરી આપી દીધી છે, જેનો અમલ પણ શરૂ કરી દેવામાં આવ્યો છે. જેથી હવે બગીચામાં ફરવા જવા માટે પણ રૂ.20નો ચાર્જ ચૂકવવો પડશે.
રિવરફ્રન્ટ પર આવેલા અટલ ફૂટ ઓવરબ્રિજ અને ફલાવર પાર્કમાં પણ ચાર્જમાં વધારો કરવામાં આવ્યો છે. સિનિયર સિટીઝન, બાળકો અને 12 વર્ષથી ઉપરના દરેકના ચાર્જમાં વધારો કરાયો છે. અટલ ફૂટ ઓવરબ્રિજમાં 12 વર્ષથી ઉપરના માટે રૂ. 30ની જગ્યાએ રૂ.50 અને ફલાવર પાર્કના રૂ.20ની જગ્યાએ રૂ. 40 ચાર્જ કરવામાં આવ્યો છે. અટલ ફૂટ ઓવરબ્રિજ અને ફલાવર પાર્ક બંનેમાં રૂ. 40ની જગ્યાએ હવે રૂ.70 કરવામાં આવ્યો છે.
સાબરમતી રિવરફ્રન્ટ ડેવલપમેન્ટ કોર્પોરેશન લિમિટેડની 21-09-2024ના રોજ યોજાયેલ પ્રોજેક્ટ કમિટી તેમજ તારીખ 15/10/2024ના રોજ યોજાયેલી બોર્ડ મિટિંગ અંતર્ગત આ ટિકિટના દરમાં નજીવો વધારો કરવાનો નિર્ણય કર્યો છે.