અમદાવાદ : અમદાવાદ ટ્રાન્સપોર્ટ કમિટી દ્વારા સને ૨૦૨૫-૨૬ નું રૂપિયા ૭૦૫ કરોડનું બજેટ રજૂ કરવામાં આવ્યું હતું. વિદ્યાર્થીનીઓનો ટિકિટ દરમાં ડિસ્કાઉન્ટ જાહેરાત કરવામાં આવી છે.ધોરણ-10 પછી સ્કૂલમાં અભ્યાસ કરતી વિદ્યાર્થીનીઓને ટિકિટ દરમાં 85 ટકા અને અને વિધવા બહેનોને 50 ટકા ડિસ્કાઉન્ટ આપવામાં આવશે. ધોરણ-10 પછી અભ્યાસ કરતા માતા-પિતા વગરના બાળકો માટે ફ્રી પાસ સેવા શરૂ કરવામાં આવશે.
પ્રાપ્ત રિપોર્ટ મુજબ, AMTS કમિટીના ચેરમેન ધરમસિંહ દેસાઈએ જણાવ્યું હતું કે, વર્ષ 2025-26નું ટ્રાન્સપોર્ટ મેનેજર દ્વારા 682 કરોડનું બજેટ રજૂ કરવામાં આવ્યું હતું, જેમાં આજે સોમવારે ટ્રાન્સપોર્ટ કમિટી દ્વારા 23 કરોડના વધારા સાથે 705 કરોડનું બજેટ મંજૂર કર્યું છે. નાગરિકોને જાહેર પરિવહનની સેવા સારી રીતે મળી શકે તેના માટે 1172 બસમાં વધુ 100 નવી એસી સીએનજી બસો મેળવીને 1272 જેટલી ફીટ બસો દોડશે. આમ કુલ 445 જેટલી નવી બસોનો ઉમેરો કરવામાં આવશે.
શ્રાવણ માસની જેમ દર શનિવારે અને રવિવારે સ્પેશિયલ ધાર્મિક પ્રવાસ બસનું પણ આયોજન કરવામાં આવશે. શહેરના પૂર્વ વિસ્તારમાં બે નવા બસ ટર્મિનસ બનાવવામાં આવનાર છે. જેમાં સરસપુર વિસ્તારમાં આઈ.ટી.આઈ પાસે અને મેઘાણીનગરમાં એસપી કોલેજ ડમરુ સર્કલ પાસે ટર્મિનસ બનાવવામાં આવશે. 16માં નાણાપંચની ગ્રાન્ટમાંથી 2 કરોડ મેળવીને AMTS બસમાં પ્રવાસીઓની ટિકિટ માટેનું ટિકિટિંગ મશીન ખરીદવા પણ ઠરાવવામાં આવ્યું છે. દરેક ટર્મિનસ પર ખાણીપીણી કાઉન્ટર અને વેન્ડિંગ મશીન પણ શરૂ કરવામાં આવશે.
16માં નાણાપંચની ગ્રાન્ટમાંથી 8 કરોડ રૂપિયા મેળવીને વધુ ચાર ઈલેક્ટ્રીક એસી ડબલ ડેકર બસો ખરીદવામાં આવશે. શહેરમાં વધતાં જતા વિસ્તારમાં બસોને કંટ્રોલ કરવા માટે PPP ધોરણે કંટ્રોલ કેબિન પણ ઉભી કરવામાં આવશે. અમદાવાદ શહેરના 77 કિલોમીટર વિસ્તારના રીંગરોડ પર બસોના નાઈટ પાર્કિંગ અને મેઈન્ટેનન્સ માટે છ જેટલા ટર્મિનસ બનાવવામાં આવશે, જેની પાછળ 12 કરોડની ગ્રાન્ટ જયંતિ મુખ્યમંત્રી શહેરી વિકાસ યોજનામાંથી મેળવવામાં આવશે. AMTS, BRTS અને મેટ્રો રેલ ટિકિટને ઇન્ટીગ્રેશન પણ કરવા અંગે પણ ઠરાવવામાં આવ્યું છે.
આજે AMTS કમિટી દ્વારા મૂકવામાં આવેલા બજેટને લઈને વિપક્ષના નેતા શહેઝાદખાન પઠાણે આક્ષેપ કરતા જણાવ્યું હતું કે, અમદાવાદ મ્યુનિસિપલ ટ્રાન્સપોર્ટ સર્વિસ (AMTS) બસ સેવા ભાજપના સત્તાધીશો પોતાના મળતીયા કોન્ટ્રાક્ટરોને લાભ અપાવવા માટે કરાતા અંધેર વહીવટના કારણે ખાડે ગઈ છે. દિન-પ્રતિદિન દેવું વધતું જાય છે અને હાલમાં 4710 કરોડ સુધી દેવું પહોંચી ગયું છે. 1172 બસોમાંથી 1047 જેટલી બસો કોન્ટ્રાક્ટરોની અને માત્ર 118 જેટલી બસો AMTS માલિકીની ચાલી રહી છે. AMTS ભાજપના મળતીયા કોન્ટ્રાક્ટરોના લાભાર્થે ચલાવવામાં આવે છે.
વધુમાં તેઓએ આક્ષેપ કર્યો હતો કે, AMTSની ખાનગી કોન્ટ્રાક્ટરની બસોના ડ્રાઇવરો દ્વારા અકસ્માત કરવામાં આવે છે ત્યારે તેઓને છાવરવામાં આવી રહ્યા છે. જ્યારે કોઈ અકસ્માત સર્જાય તો તેમાં ભોગ બનનારને કોઈ વળતર આપવામાં આવતું નથી. બસના ડ્રાઇવરો ચાલુ મોબાઈલ પર વાત કરતા હોય છે. દારૂ પીને અને કેટલાક તો લાઇસન્સ વિનાના પણ ડ્રાઇવર બસ ચલાવે છે. ઓવર સ્પીડમાં બસ અને ટ્રાફિક સિગ્નલના ભંગ કરીને પણ બસ ચલાવતા હોય છે ત્યારે આવા ખાનગી કોન્ટ્રાક્ટરો વિરુદ્ધ કોઈ કાર્યવાહી થતી નથી. નાણાકીય વર્ષ 2025 – 26નું બજેટ માત્રને માત્ર કોન્ટ્રાક્ટરના લાભાર્થે મંજૂર કરાયું છે.