અમદાવાદ : અમદાવાદના એસજી હાઈવે પર અકસ્માતનો બનાવ બન્યો છે. ગોતા બ્રિજ ઉતરીને BMW કાર વૈષ્ણવ દેવી તરફ જઈ રહી હતી, ત્યારે રોડ પર કૂતરું આવતા કાર ચાલકે તેને બચાવવા ગાડી ડિવાઇડર પર ચડાવી દીધી હતી. આ અકસ્માત જોવા માટે સામેના રોડે એક કાર ચાલકે અચાનક બ્રેક મારી તો તેની પાછળ બીજી બે કાર ટકરાઈ હતી. જેથી એક જ જગ્યા ઉપર અકસ્માતના બે અલગ અલગ બનાવ્યા છે. જોકે, સદનસીબે અકસ્માતમાં કોઈપણ જાનહાનિ થઈ નથી.
પ્રાપ્ત રિપોર્ટ મુજબ, સરખેજ ગાંધીનગર હાઇવે પરથી એક BMWના કારચાલક તેમની ગાડી લઈને ગોતા બ્રિજ ઉતરીને વૈષ્ણોદેવી સર્કલ તરફ આગળ વધી રહ્યા હતા. ત્યારે રસ્તામાં એક કૂતરું આવ્યું હતું જેને બચાવવા માટે BMWના કાર ચાલકે રસ્તાની બાજુમાં આવેલા ડિવાઇડર પર ઝડપે કાર ચડાવી દીધી હતી. જેના કારણે ડિવાઈડરને નુકસાન થયું છે અને કારને પણ નુકસાન થયું છે. આ અકસ્માતનો બનાવ બન્યા બાદ સામેના રોડ પર જતા કારચાલકે અચાનક અકસ્માત જોવા માટે કારની બ્રેક મારતા પાછળથી આવી રહેલી અન્ય બે કાર પણ ટકરાઈ હતી, જેથી એક જ જગ્યા પર અકસ્માતના બે અલગ અલગ બનાવો બન્યા હતા.
પૂરપાટ ઝડપે આવી રહેલી BMW કાર ડિવાઈડર પર ચઢી ગઈ હતી. પરંતુ તેમાં કાર ચાલકને કોઈ જાનહાની થઈ નથી. આ ઉપરાંત સામેના રોડે પણ અકસ્માત જોવા ઊભેલી કારને પાછળથી બીજી બે કારે ટક્કર મારી તેમાં પણ કોઈપણ વ્યક્તિને ઇજા પહોંચી નથી. બંને બનાવ અંગે ટ્રાફિક પોલીસ દ્વારા તપાસ કરવામાં આવી રહી છે.