અમદાવાદ : અમદાવાદની મણિનગર સ્થિત હેબ્રોન સ્કૂલમાં એક ચોંકાવનારી ઘટના સામે આવી છે. ધોરણ 7માં અભ્યાસ કરતા એક વિદ્યાર્થીને ગુજરાતી વિષયના શિક્ષક રૂબીના દ્વારા માર મારવામાં આવ્યો હોવાનો આક્ષેપ વાલી દ્વારા કરવામાં આવ્યો છે. આ અંગે વાલીએ DEO કચેરીએ ફરિયાદ કરતા જિલ્લા શિક્ષણાધિકારી દ્વારા સ્કૂલ સામે તપાસના આદેશ આપવામાં આવ્યા છે અને શિક્ષિકાને પણ તાત્કાલિક છૂટા કરવામાં આવ્યા છે.
પ્રાપ્ત રિપોર્ટ મુજબ, મણિનગરમાં આવેલી હેબ્રોન સ્કૂલમાં ગુજરાતી વિષયના શિક્ષિકા રૂબીનાએ ધો. 7માં અભ્યાસ કરતા વિદ્યાર્થીને કોઇ કારણસર ઢોર માર માર્યો હતો. વિદ્યાર્થીએ આ અંગે ઘરે જઈને વાત કરી હતી. ત્યાર બાદ વિદ્યાર્થીને માર મારતા તેની પીઠ લાલ થઈ ગઈ હતી. જેથી વાલીએ વિદ્યાર્થીના ફોટા અને લેખિતમાં DEO કચેરીને ફરિયાદ કરી છે. વાલીએ ફરિયાદ કરીને શિક્ષિકા સામે કડક પગલાં લેવાની પણ માગ કરી છે. આ કેસમાં પણ તપાસ કરવામાં આવશે અને જરૂર પડે તો પોલીસ ફરિયાદ પણ કરવામાં આવશે. ઉલ્લેખનીય છે કે આ વિવાદ વકર્યો હતો.
વાલીની ફરિયાદને ધ્યાનમાં રાખીને અમદાવાદ શેહર DEO દ્વારા સ્કૂલને તાત્કાલિક નોટિસ કરવામાં આવી છે. સ્કૂલ પાસેથી લેખિતમાં એક દિવસમાં ખુલાસો માગવામાં આવ્યો છે તેમજ શિક્ષિકાને ડિસમિસ કરવાનો આદેશ પણ કરવામાં આવ્યો છે. આ ઉપરાંત સ્કૂલમાં જે ઘટના બની તેનો રિપોર્ટ એક દિવસમાં કચેરીએ સબમિટ કરવાનો પણ આદેશ આપવામાં આવ્યો છે.ઉલ્લેખનીય છે કે DEOએ જો આદેશનું પાલન નહીં થાય તો શાળા સંચાલક સામે સખ્ત પગલાં લેવામાં આવશે.